Қазалы станциясы: жылды табысты қорытындыламақ
Қызылорда облысы бойынша меншікті тілші
Қазалы станциясының ұжымы жылды табысты қорытындылайды. Жыл бойы пойыздық және маневрлік жұмыс кезінде пойыздардың қозғалыс қауіпсіздігінің бұзылуына жол берген жоқ.
Ағымдағы жылдың он бір айында санцияға аялдаған 842 пойыздан 977 вагонды ажыратып, 331 пойызды құрастырып жөнелткен. Сөйтіп өндірістік жұмыс көрсеткіштерін 106,4-183,1 пайыз аралығында орындауға қол жеткізген. Станция бастығының орынбасары Руслан Махашов осындай жақсы көрсеткіштермен бөлісті.
-Биылғы жыл өзіндік ерекшелігі де, қиындығы да басым жыл болды. Дегенмен карантиндік шектеулерден кейінгі кезеңде өндірістік жұмыстарды үйлестіруде барлық кедергілерді еңсере білдік. Станция ұжымы талай жыл өндіірсте кәсіби шыңдалған мамандардан құқралған. Сондықтан жұмыста қателік, ақауға жол беру жоқтың қасы ,-дейді станция бастығының орынбасары.
Станцияға келген-кеткен пойыздарды реттеп отыратын кезекшілер мен пойыз құрастырушылардың жұмысында үзіліс жоқ. Бір вагонды құрамнан ағытса, екінші бірін тиісті кірме жолға бағыттайды, енді бірін жөнелтілетін пойызға тіркеп жатады... Шын мәнінде қыстың қақаған суығында мұздай темірді мығым ұстап құрамнан вагон ағыту, оны келесі құрамға жалғау, олардың құжаттарын реттестіріп, келесі бір пунктке жөнелту секілді тынымсыз да мазасыз жұмыстың үдесінен шығу – тек өз ісіне берілген кәсіп иелерінің ғана қолына келеді.
Қазалы станциясында ондай теміржолшылар аз емес. Оладың қатарында станция кезекшісі Ө. Қарабеков, жүк вагондарының тасымал құжаттарын өңдеуші Назгүл Ахметова, пойыз құрастырушы Нұрғазы Өтекештер бар.
