Балқаш станциясында жүк тиеу 9 мың вагонға артық орындалды

Қарағанды өңіріндегі негізгі станциялардың бірінен саналатын Балқаш станциясы өткен жылды табысты аяқтады. Мұны жүк тиелімінен анық байқауға болады.

Айталық, былтыр станция аумағынан вагондарға тиелген жүк көлемі 9062 вагонға артық орындалып, жоспар 180% құрап, 2021 жыл көрсеткішінен 17% жоғары болған. Тонналық көрсеткіштің де жоспары 188% орындалып, алдыңғы жылдан 19% артық шыққан. Статистикалық жүктеменің де салмағы ауыр. Станцияда әсіресе мыс, түсті кен, күкірт қышқылы сияқты жүк түрлерінің тиелімі артқан. Былтыр вагондардан жүк түсіру де жоғары нәтиже көрсеткен: 89475 вагоннан жүк түсіріліп, жоспар 112% орындалған. Бір жүк операциясы кезінде вагонның тұрып қалуы 5,39 сағатқа кеміген. Бұл өз кезегінде вагонайналымы көрсеткішінің жақсаруына септігін тигізген.  

Десе де, кірме жолдардың қожайындары кінәсінен вагондардың кідірісі орын алған. Мәселен, «Корпорация Казахмыс» ЖШС-ның кірме жолында вагондар айналымының технологиялық мерзімі нормадағы 18,99 сағаттың орнына 25,08 сағатты құраған. Осылайша, кірме жолдағы вагондардың тұруы 6,09 сағатты құрап отыр.  

Оның себептерін кірме жол иесі үш фактормен байланыстырады. Біріншіден, вагон жүк тиегіштерінің істен шығуы кедергі болса, екіншіден, вагондардың бір мезгілде жаппай келуі салдарынан жүк түсіру шебінің өлшемдері бәрін бірдей түсіруге мүмкіндік бермей отырған көрінеді, үшіншіден, вагондар мұз қатқан күйде келгендіктен алдымен жылытатын жерлерге орналастырылады. Ал ол уақыт деген сөз.  

Жалпы алғанда өткен жылы Балқаш станциясы бойынша пойыздарды қабылдау мен жөнелту, өткізу және маневрлік жұмыстар барысында қозғалыс қауіпсіздігі қамтамасыз етіліп, төтенше оқиғалар мен жағдайларға жол берілмеген, сонымен қатар, вагон паркінің сақталуында ешқандай кінәрат орын алмаған.  

– Балқаш станциясы ұжымының еселі еңбегінің арқасында былтыр пайдалану көрсеткіштері толық орындалды деуге болады. Жұмысымызды Компания мен «ҚТЖ-Жүк тасымалы» ЖШС және бөлімше басшылығының бұйрықтарын, нұсқаулық, жеделхаттарын негізге ала отырып жүргіземіз. Еңбек қорғау, техника қауіпсіздігін сақтау, пойыздардың қозғалыс қауіпсіздігін қамтамасыз ету басымдыққа ие. Өткен жылы осы мәселелерге қатысты көптеген іс-шаралар мен айлықтар өтті. Олар теміржолшылардың білім-біліктілігін көтеруде маңызы зор, – дейді станция басшысы Аманжол Омаров.