Ақжайық станциясында жүк тасымалы артып келеді

Өткен жылды Ақжайық станциясы табысты аяқтады. Былтыр барлығы 1162 пойыз, 27582 вагон қабылданыпты. Жалпы, қалаға келетін жүктің 60 пайызы осы станцияға тиесілі.

Станцияның 7 қабылдап-жөнелту, 3 тұрақтау жолы бар. Маневр жұмыстары станция ішінде жасалып, ол екі маневрлік тепловозбен атқарылуда. Станциядан күніне 2-3 пойыз, 100-150 вагон қабылдап-жөнелтіледі, жолдары қысқа, дөңесі жоқ станция үшін бұл аз емес, әсіресе жүк тиеу мен түсіру көлемі артып кеткен кезде қиын. Станцияның жаңа басшысы Бағытжан Абрахмановтың айтуынша, өткен жылы жоспар межеден көріне алды. Мәселен, вагон айналымы 109,5%-ке орындалды.

Орташа тәуліктік жүк тиеу көлемі жоспарда 3 вагон болса, ол толық орындалған. Тоннамен есептегенде станция арқылы тәулігіне 176 тонна жүк тиеліп, жоспар 96,2 пайызды құраған.  

Өңірдегі мұнай компанияларының тоқтаусыз жұмыс жасауы тасымал көлеміне оң әсер етіп тұр. Ал жүк түсіру тәулігіне 60 вагон болса, ол 90 пайызға орындалған. Атырау аймағында «Ақтөбе-Атырау-Астрахань», «Миялы-Қарабау-Индер» тас жолдары құрылыс жұмыстарының қарқынды жүруі де жүк көлемі мен салмағының артуына ықпал етіп отыр. Жергілікті вагонның бір жүк операциясына тұруы да 98,5 пайызды құрап, жоғары көрсеткішті бағындырды.  

Ақжайық мұнаймен ғана жұмыс жасамайды, цистерналарға бензин, мазут, реактивті отын құйылады, еліміздегі ауыл шаруашылығы мекемелеріне тапсырыс бойынша дизель отыны жіберіледі.  

– Станция қалыпты жұмыс жасауда. Барлық инженерлік құрам мамандары, мысалы, аға тауар кассирі, аға жүк қабылдап-жөнелтуші, еңбек қорғау инженері, т.б. тұрақты жұмыс орындарына оралды. Станция бойынша кезекшілер, вагон қараушы, басқа да мамандар ауысыммен жұмыс істейді. Жүк тасымалының көлемі артып келеді, – дейді станция бастығы.