Қарғын су: Семей теміржол нысандарына төніп тұрған қауіп жоқ
Абай облысы бойынша меншікті тілші
Семей ЖТ бөлімшесі су тасқыны қаупінің алдын алып, желі бойындағы қауіпсіздікті қамтамасыз ету шараларын тәулік бойы кешенді түрде іске асыруда.
Аймақта ауа температурасының күрт жоғарылауымен және ақпан айының аяғында, сондай-ақ наурыз айының басында жауған жауын-шашынның көп мөлшерінен су тасқыны қаупі туындаған еді. 1 наурыздағы жағдай бойынша, орташа есеппен алғанда аймақтағы таулы жерлерде қар жамылғысының биіктігі 9-дан 74 см-ге дейін, топырақтың қатуы 24-тен 126 см-ге дейінгі көрсеткішті құраған. Бұл бағытта теміржолшылар жергілікті атқарушы органдармен бірлесіп, облыс аумағындағы тірек гидротехникалық құрылыстардың және су объектілерінің жай-күйіне күнделікті мониторинг жүргізу шараларына назар аударуда. Арнайы құрылған жұмыс тобы өңірдегі еріген қар сулары жиналған аймақтарды, соның ішінде биылғы жылғы су тасқыны кезеңінде ықтимал қауіпті орындарды тексеруде.
Бүгінгі таңда өңір бойынша барлығы 95 гидротехникалық құрылыс бар екен. Оның біршамасы желі бойына таяу орналасқан. Әйтсе де, қазіргі күні теміржол нысандарына төніп тұрған қауіп жоқ.
Семей магистральдық желі бөлімшесінің аумағы – республикамыз бойынша жауын-шашын мол түсетін әрі өзен және бұлақ сулары өте көп аймақ. Өңірдің 8 аумағы қызыл су басу қаупі жоғары алап саналады. Жалпы наурыздың 12-сі күнгі көрсеткіш бойынша НЖС-6 бөлімшесіне тиесілі 440 көпір, 368 құбыр, 181 км арық, 1216 км су жүретін арналар қардан толық аршылып, тазаланған. Мұнымен қоса, көктемгі сең жүру және қызыл су тасқынының алдын алып, қажет жағдайда шұғыл жұмылдыру мақсатында қажетті техникалар сапта тұр. Бөлімше бойынша 5 пойыз жасақталып, платфорформалар жолға шығуға сақадай сай.
Қазіргі күндері Семей ЖТ бөлімшесі бойынша, су шаю қаупі ең жоғары аумақтар ретінде Жаңа-Семей және Аягөз жол дистанциясының қарамағындағы телімдер саналады. Ал күллі бөлімше қарамағындағы желі бойында жалпы саны 89 қауіпті орын бар. Оның ішінде ПЧ-39-да – 6, ПЧ-40-та – 13, ал Аягөз жол дистанциясы бойынша 20 орын қатерлі аумақтар тізімінде тұр. Әйтсе де, қыс бойы жүргізілген қардан тазарту және көктемгі әзірлік жүмыстары қауіптің бетін қайтарған.