Желілік полиция бөлімі көмекке келді
Ақтөбе облысы бойынша меншікті тілші
Ақтөбе станциясындағы желілік полиция бөлімінің қызметкерлері қаладағы қарттар үйіне жиі барып, қолдан келгенше көмектесіп отырады.
Бұл жолы тәртіп сақшылары әлеуметтік орталық ауласындағы қыс бойы жиналған қарды шығарып, айналаны тап-таза қылды.
Ақтөбе станциясы ЖПб бастығының орынбасары Армас Молдағалиев бастаған тәртіп сақшылары қолдарына күрек пен қайла ұстап екі сағат бойы ауланы қардан, қатқан мұздан арылтып, қарт кісілер мен мүгедек жандардың серуендейтін алаңын еріген қардан тазартты. Күн жылына бастағалы сыртқа шығып таза ауада серуендейтін қариялар қуаныштарын жасыра алмай алғыстарын жаудырып, батасын берді. Тәртіп сақшылары ішқұса болған жандарға азын-аулақ сый-сияпаттарын да ала келіпті. Олармен тілдесіп, бір ауық көңілдерін аулады. Айтуларынша, мұндай қайырымдылық акциялары жыл бойы жалғаса бермек.