Тараз вокзалындағы бір күн

Тәулігіне 24 жолаушылар пойызы өтетін Тараз вокзалынан күндіз-түні адам арылған емес. Бірі діттеген жеріне жете алмай, енді бірі кері қайта алмай әбігерге түсіп, эмоцияға беріліп, шыдамсыздық танытып жататын жолаушы халыққа қалтқысыз қызмет көрсетуден танбайтын вокзал қызметкерлерінің кәсібилігі еріксіз сүйсінткендей.

Өткені айғай-шуы көп, алуан түрлі адамдардың басы қосылған жерде түрлі жағдай орын алып жатады. Әне, қолжүгін жоғалтқан әйел бүкіл вокзалды басына көтеріп, айғай сүрең салып жатыр. Лезде жүгіріп келген вокзал бастығының көмекшісі бір топ қызметкермен іске кірісті, дереу желілік полиция қызметкері келіп жетіп, іздеу, тексеру, бейнекамераны қарау жұмыстары басталып, сәлден соң қытайдың торкөз сөмкесі табылып, иесіне қайтарылды.  

Мен келгенде вокзал бастығы Дидар Мүсіретәлиев әріптестерімен дидарласып, жұмыс жайын талқылап отыр екен. 

«Қазір қала бойынша көктемгі тазалық, абаттандыру екі айлығы жүріп жатыр. Соған орай перрондағы сауда нүктелерінің қожайындарымен бірлесе сенбіліктер ұйымдастыру жайын талқылап жатырмыз. Перронда 17 сауда нүктесі және бір дәмхана бар. Өзіңіз куә болғандай, қыс айларында біздің қызметкерлер тәулік бойы кезекшілікте болады. Өйткені, «Батыс Еуропа-Батыс Қытай» халықаралық тас жолының жабылуына біздің де етіміз үйреніп кеткен», – деді Дидар.  

Байқағаным, вокзалдың әр аумағында бейнебақылау қойылған. Вокзал басшысы мұнда бүгінгі күні 80 камераның қойылғанын алға тартты. Ондағы жазбалар 30 күнге дейін сақталады екен. Вокзалдың іші-сырты, перрон айнадай тап-таза.  

– Тазалық жұмыстарын өз күшімізбен жүргіземіз. Қазір төрт жерге 20 контейнер қойылған. Ондағы күл-қоқыстарды тәулігіне бір рет бізбен келісімшартқа отырған жеке компания алып кетеді. Ғимарат ағымдағы жөндеуден өтті. Дегенмен, оны әлі қабылдап ала алмай отырмыз. Бұл жерде кінәрат мердігер компаниядан болып тұр, – деді вокзал бастығы.  

Еңбекті қорғау, қауіпсіздік, жұмыс орнын ұйымдастыру бойынша айына екі рет техникалық сабақ өтіп тұрады екен. Терроризмнің алдын алу бойынша да жолаушыларға жадынамалар таратылып, мамандар дәріс өткізуде. Техникалық қызметкерлердің жұмыс орны тиісті деңгейде ұйымдастырылған. Мүгедектерге арналған пандус, әжетхана, касса бар. Ал қонақ үй, билет сататын кассалар, асхана – бәрі жалға беріліп отыр. Өткен жылы вокзалдың қалаға шығар алаңшасына ескерткіш ретінде тепловоз қойылған болатын. Алайда, пойыз 20 минут тұрақтағанда жолаушылар онда барып, суретке түсіп немесе тамашалап үлгермейді екен. Соны ескерген вокзал басшылығы алдағы перронға «I LOVE TARAZ» деген белгі қоймақшы. Ол түнде де түрлі жарықтармен безендіріліп, жолаушылардың Таразға келгенде естелікке суретке түсер орнына айналмақ.