Абай еліндегі әз Наурыз
Абай облысы бойынша меншікті тілші
Семейлік теміржолшылар биылғы Наурыз мерекесін жылдағыдан өзгеше атап өтті. Себебі араға 25 жыл салып, облыс орталығы мәртебесін қайта алған қала үшін бұл мерекенің мән-маңызы ерекше еді.
Мерекелік шаралардың басты ұйымдастырушысы салалық кәсіподақ ұйымы Наурыз тойының сән-салтанатпен өтуіне күш салды. Бұл күні шаһардың теміржол бекеті алаңына желі бойындағы мекемелердің күшімен он шақты киіз үй тігіліп, жұртшылықты аста-төк дастарханмен қарсы алды.
Мерекелік іс-шараның ашылу салтанатында бөлімше басшысы Владимир Бабиченко, ардагерлер кеңесінің төрағасы, қадірменді ақсақал Қырықбай Әлсейітов пен салалық кәсіподақ ұйымының төрағасы Алик Досанов сөз алып, көпшілікті Ұлыстың ұлы күнімен құттықтады. Абай облысының әкімі Нұрлан Ұранхаев «Теміржолшылар ауылына» келіп, мерекелік дастарханнан дәм татты. Ізгі тілегін білдіріп, теміржолшыларға еңбекте табыс тіледі.
Басты ерекшелік – ұлттық спорт түрлері ойнатылып, салт-дәстүрлер дәріптелді. Әсіресе арқан тартыс мейлінше тартысты өтті. Оған желі бойындағы барлық теміржол мекемелерінің құрыш білекті жігіттері қатысқан болатын. Ал кадр бөлімі мен кәсіподақ ұйымдары жетекшілерінен тұратын арнайы комиссия 9 киіз үйді аралап, төрт номинация бойынша үздіктерді таңдады.
Барлық жеңімпаздар мерекенің қорытынды сәтінде марапатталып, ақшалай сыйлыққа ие болды. Атап айтсақ, ұлттық киімдер мен қолөнер түрлерін дәріптеу, ұлттық тағамдар әзірлеуде Семей және Жаңа-Семей станциясы, Семей жол дистанциясы және арқан тартыста айқын басымдықпен жеңіске жеткен Семей белгі беру және байланыс дистанциясы ұжымдарының шоқтығы биік болды. Мереке қалалық мәдениет сарайының өнерпаздары қойған концертке ұласты.
