Шымкентте дәстүрлер дәріптелді
Шуақты көктеммен бірге наурыз мерекесін қарсы алған шымкенттік теміржолшылар ұлыс оң болсын, ақ мол болсын деп бір-бірін Ұлыстың ұлы күнімен құттықтады.
Жүк тасымалы мен магистральдық желі бөлімшесінде басталған мерекелік іс-шара теміржол мекемелерінде жалғасты. Шымкент белгі беру және байланыс дистанциясында өткен думан ерекше назар аударарлықтай қызықты, танымдық тұрғыда өтті. Онда «Беташар», «Тұсаукесер», «Сырға салу» сияқты қазақтың салт-дәстүрлерінен көрініс көрсетіліп, жұмысшылар арасында қазақ тарихына байланысты викториналық сұрақ-жауап ойыны ұйымдастырылды. Ал жігіттердің арасында арқан тартыс, қол күрес, кір тасын көтеру сияқты ұлттық спорт түрлерінен жарыс өтіп, жеңімпаздар арнайы жүлделермен марапатталды. Ұлттық киімдер жәрмеңкесі өтіп, өзінің ұлттық бас киімімен ерекшеленген Гүлмира Темірханқызы ерекше ілтипатқа ие болды. Әз Наурыздың жоғары деңгейде өтуіне мұрындық болған дистанцияның кәсіподақ төрағасы Бауыржан Әбзенов мен кадрлар бөлімінің менеджері Алмагүл Ермановаға ұжым басшылығы атынан алғыс айтылды.
Сабира БАЙЗАХОВА, Шымкент