Қызылордалық теміржолшылар сергіту жаттығуларын қолға алды (Фото)

Қызылорда қосалқы бөлімінің спорт секторлары кеңсе қызметкерлерінің жұмысқа құлшынысын арттыру үшін сергектік жаттығуларын жүргізуді қолға алды.  

Олар таңертеңгілік жұмыс алдында спорттық жаттығулардан кейін бөлімшелердің әр бөлімін аралап сергектік жаттығуларын өткізуде. Бір апта бұрын қолға алынған бұл бастаманы теміржолшылар да құп көріп жаттығуға атсалысуда. Теміржолшыларды сергітіп, олардың жұмысқа деген құлшынысын оятуға мұрындық болып жүрген бөлімнің спорт секторы Бақытжан Имбергенов. Оның айтуынша, жаттығуларды өткізуге бөлімше мен «Қазкөліккәсіп» ҚБ филиалы мен бөлімшелердің кәсіподақ ұйымдары басшылығы келісім берген.

– Жұмыс алдындағы спорттық жаттығуларды бөлімшенің дәлізіне жастарды жинап, өткізуден бастадық. Одан кейін әр бөлімдегі жұмыс кабинеттерінде де жаттығу ұйымдастырдық. «Жаны саудың тәні сау» дегендей таңертеңгілік жаттығуды әркім үйінде жасап келгенімен жұмыс орнында, ұжыммен өткізген сергіту жаттығуының әсері бір бөлек. Жаттығуден кейін теміржолшылардың жұмысқа деген серпілісі арта түсері сөзсіз,  – деді Б. Имбергенов.

Көптен бері мұндай жаттығу өткізілмей кеткендіктен алғашында тосырқай қараушылар да болған, күн өте жаттығу жасауға теміржолшылар бейімделіп, белсенді қатысуда. Алдағы күндері бұл жұмыстар Қызылорда станциясындағы салалық мекемелерде де өткізіледі.

Кәсіподақ ұйымы мен бөлімшенің белсенді жастары теміржолшылардың спорттық жаттығуға деген қызығушылыған ояту үшін бір түсті киім киіп жаттығу өткізді. Соның нәтижесінде барлық бөлімдерде жаттығу өткізу жұмыстары жалғасын тапты.