Семейлік теміржолшыларды арнайы киіммен жабдықтауда кедергі жоқ

Теміржол саласында еңбекті қорғауға ерекше көңіл бөлінеді. Желі бойындағы әр еңбеккердің «бес қаруы сай» болуы маңызды. Бұл мәселе ұлттық компания басшылығының қатаң қадағалауында.

Жуырда Семей ЖТ бөлімшесіне «ҚТЖ» ҰК» АҚ-ның еңбек мәселесі бойынша омбудсмені Наталья Панкова арнайы келіп, бірқатар мекемелерде жиын өткізді. Басқосуға салалық қызмет бойынша тек алғы шепте жүретін вагон қараушылар, локомотившілер, жолшылар сынды қарапайым еңбек адамдары шақырылды.  

Жиында еңбек қорғауға қатысты өзекті мәселелер қозғалды. Соның ішінде теміржолшылардың маусымдық қызметтік киімдермен қамтылуы айрықша сөз болды. Қазіргі таңда семейлік теміржолшылар үшін арнайы киім, құрал-жабдықтармен қамтуда ешқандай кедергі жоқ. Рас, жеткізіп берушілердің кесірінен шамалы кешігіп жететін кездері болады. Әйтсе де, киім-кешек, әсіресе былғарыдан тігілген аяқкиімдер, мақтадан әзірленген сырт киімдер өте сапалы. Наталья Александровна бірнеше теміржолшыны көпшіліктің алдына шығарып, қызметтік киімдерін толыққанды тексеріп, тіпті қандай матадан тігілуі керектігіне дейін тәптіштеп түсіндіріп берді.

– Омбудсмен ретінде айтарым, егер де қызметтік киімдердің сапасына көңілдеріңіз толмаса немесе еңбек мәселелері бойынша түсініспеушілік туындайтын болса кадр бөліміне немесе басқа да жауапты қызметтерге жүгініңіз. Егер олардың көмегі болмаса бізге, тікелей менің өзіме хабарласыңыздар, – деп жұмыс орнының және өз ұялы телефонының номерін берді.  

Айта кетерлігі, соңғы жылдары теміржолшылар тарапынан қызметтік арнайы киімдер бойынша жасалатын шағым біршама азайған. Биыл тек екі өңірден, Семей мен Маңғыстаудан ғана көңіл толмаушылық тіркеліпті. Аталмыш жайт бірден назарға алынған. Туындаған мәселе көп ұзамай шешіледі.  

Жиынға қатысқан теміржолшылар да сөз алып, бұрынғы жылдармен салыстырғанда жарақтандыру ісі біршама жақсарғанын, жылдан жылға оң өзгерістер орын алып жатқанын жеткізді. Кездесулерде сонымен қатар, жалақы мәселесі, ұжымда жағымды климат қалыптастыру, түсініктеме жазу сынды өзекті тақырыптар да сөз болды.