Ғарышкердің есімін алған теміржолшы

Бірнеше жыл бұрын Маңғыстау станциясындағы техникалық қызмет көрсету пунктінен ақпарат алуға бардым. Алдын ала ТҚКП басшысына хабарласқанмын. Ол инструктор-нұсқаушы Владимирге тапсыратынын, қажет мағлұматты содан алуға болатынын айтқан.

Компьютер алдында отырған қараторы жігіт «мен Владимир» деп қарсы алғанда таң қалғанымды жасырмадым. «Қазақсыз ба?» деппін сасқанымнан.  

«Ия, көріп тұрсыз ғой» деді күліп... Әріптестері «Біздің Володя» дейтін Владимир Сүлейменовпен таныстығымыз осылай басталды. Ата-анасы қазақ, түрі де қазақтың қарадомалағы, неге Владимир деген журналистік әуесқойлығымыздың да жауабын алдық.  

– Мен туған жылы, дәл сол күні Кеңес одағының ұшқыш-ғарышкері Владимир Джанибеков космосқа ұшыпты. Атам мені де ғарышкер болсын деп ырымдап сол космонавттың атын қояды. Бірақ мен көкке емес, жердегі көлікке қызмет етуді таңдадым. Өзім осы мамандықты ұнаттым. Бұған дейін инженер мелиоратор дипломын алған едім. Бірақ өз кәсібімді теміржолдан таптым,– дейді Владимир Сүлейменов.  

Ол теміржолдағы еңбек жолын 2012 жылы слесарь болып бастайды. Ақтөбедегі жоғарғы оқу орнында вагон шаруашылығы бойынша білім алады. Сосын вагон қараушы болып бірнеше жыл тәжірибе жинайды. Басшылық Болашақ станциясындағы ТҚКП бастығы етіп тағайындап, ол жақта да абыройлы еңбек етті. Жуырда Маңғыстауға оралып, вагон депосының техникалық оқыту шебері болып тағайындалды. Отбасылы, екі баланың әкесі.