Теміржолшылар ғасыр жасаған ардагердің құшағын гүлге толтырды
Ақтөбе облысы бойынша меншікті тілші
Ақтөбелік теміржолшылар тыл ардагері Дәметкен Әлмұратованы Жеңіс күнімен құттықтады. Соғыс басталғанда 17 жастағы өрімдей қыз Шалқар станциясында жол бұрушы болып еңбек еткен.
«ҚТЖ-Жүк тасымалы» ЖШС Батыс аймақтық филиалының басшысы Бөріхан Беркімбаев ғасыр жасаған ардагердің құшағын гүлге толтырды. Қарияға ақшалай сыйлықпен қатар тәттілер себеті тарту етілді.
Тыл ардагері Дәметкен Әлмұратова 99 жаста. Қария бұрынғыдай емес. Құлағы ауыр естиді. Бірақ ойы жүйелі, естеліктері де сол қалпында.
«Біз жұмыс талғаған жоқпыз. Соғыс кезінде ертелі-кештегі күнімізді шойын жолдың қара жұмысын атқарумен өткіздік. Көмірді арқалап жүріп таситын едік. Одан қалды соғыстағы азаматтар үшін киім тоқимыз. Кезекшілікте май шаммен отырып тоқыған шұлық, қолғаптардың есебі жоқ, бәрін майданға жөнелттік», – деді Дәметкен Әлмұратова.
Оқуды тастап, соғысқа кеткен әке орнына Шалқар станциясына жол бұрушы болып жұмысқа кірген жас қыз кейін Қазалы қаласындағы техникалық мектепті тәмамдап, станция кезекшісі болып ауысады. Шалқар ауданындағы №62 Тобылғысай разъезінде 1974 жылға дейін еңбек еткен. Көпбалалы ана ретінде 50 жасында еңбек демалысына шыққан. Алты бала тәрбиелеген қарт ананың ұлдары да теміржол саласында еңбек етіп, қазір зейнет жасына шығып отыр. Кейуана қазіргі бейбіт заманға шүкіршілік етеді.