Теміржолшылар білім-білігін ортаға салды

Қызылорда локомотив пайдалану депосында «Ең үздік еңбек қауіпсіздігі, еңбек қорғау инспекторы» тақырыбында өткен байқауға  Сексеуіл мен Шорнақ станциялары арасында мекемелердің еңбек қорғау инженерлері мен еңбек инспекторлары қатысты.    

Теміржолшылардың білім-білігін ортаға салған сайысқа төрелік жасаған Қызылорда қосалқы бөлімінің еңбекті қорғау және экологиялық қауіпсіздік бөлімінің басшысы Ғалия Көпжасарова мен бөлімнің кәсіподақ ұйымы төрағасы Мұхтар Көпірбаев, Қызылорда локомотив пайдалану депосы бастығының орынбасары Қанат Камилаев пен Әзімхан Жиенбаев ең үздік еңбек қорғау инженерін  анықтады.

Қызылорда қосалқы бөлімінің «НОД-ГП», Сексеуіл локомотив пайдалану депосының «ТЧЭ-36», Қазалы вагон пайдалану депосының «ВЧД-6» және Қызылорда локомотив пайдалану депосының «ТЧЭ-34» командалары осынау үздік аталымға таласып, еңбек қорғау тақырыбында бақ сынасты. Конкурстың әр турында командаларға түрлі тақырыпта сауал беріліп, ең дұрыс әрі толық жауапты сараптап, таңдап, ұпай беру төрелік жасаушы қазыларға да оңай болған жоқ.

– Байқауға қатысушыларға төрт турдың ерекшеліктеріне қарай сауалдар беріледі, ең үздік, дұрыс әрі толық жауап берген командаға жоғары ұпай беріледі. Әрине, үздіктер сайыс қорытындысына орай анықталмақ, – деді еңбекті қорғау және экологиялық қауіпсіздік бөлімінің басшысы Ғалия Көпжасарова.

Конкурстың төрт турында түрлі ситуациялық жағдайлар, олардан шығу жолдарының бірнеше нұсқасы ұсынылып, тура жауап берген командаға жоғары балл қойылды. Еңбек қорғау ережелеріне қатысты сауалдар, суреттен кемшілікті анықтау, тест сұрақтары мен блиц турнир форматындағы сайыс сынақтарының  әрқайсысына берілген жауаптар сарапталып, үздік команда мен үздік еңбек қорғау инженерін анықтауға ұзақ уақыт кетті. Командалардың бәрі де сауаттылық танытты, ал жекелей сынға түскен инженерлердің барлығы жауап беру кезінде өз мамандығын терең әрі кәсіби деңгейде меңгергендіктерін дәлелдей білді.   Сондықтан кеңесе келе қазылардың шешімімен төрт құрама команда да үздік деп танылды және бәрі де жүлдесіз қалмады.    

– Бөлімшедегі осындай конкурс, семинарлар, өзге де танымдық шаралар теміржолшылардың кәсіби деңгейін жетілдіріп, тәжірибе арттыруына әсер етеді. Бүгінгі конкурста еңбек қорғау тақырыбында мол мағлұмат алдық, – деді «НОД-ГП» құрама командасының мүшесі, инженер Динара Оразалиева.