Денсаулығы сыр берген жолаушы бірден оқшауланды
Маңғыстау облысы бойынша меншікті тілші
Жуырда №8801 «Қарақалпақ-Бейнеу» жұмысшы пойызында денсаулығы сыр берген жолаушы пойыздан түсіріліп, қажетті көмек көрсетілді. Жолаушының басы ауырып, қалтырап, дене қызуы көтерілген және өзін нашар сезінген...
Пойыз бригадасы бірден тиісті орынға хабар беріп, науқасты оқшаулауға алады. Бұл жағдайдан алдымен Бейнеу дистанциясының кезекші диспетчер қызметі құлағдар болып, әрі қарай шұғыл әрекетке кіріседі. Хабарламаны Бейнеу станциясының санитарлық-карантиндік бөлімінің маманы мүдделі мекемелерге жеткізіп, науқастың белгілері оба ауруына ұқсағандықтан індетке қарсы және алдын алудың жедел шараларын қолға алады.
Бұл таяуда Бейнеу станциясында өткен обаға қарсы оқу-жаттығуы болатын.
– Бүгінгі оқу-жаттығу жұмысы карантиндік және аса қауіпті жұқпалардың тасымалдауын және таралуын болдырмау, санитарлық-эпидемияға қарсы іс-шараларды ұйымдастыру және өткізу бойынша кешенді жоспарға сай жүргізілді. Көліктегі санитарлық-эпидемиологиялық бақылау департаментінің Бейнеу станциясындағы санитарлық-карантиндік бөлімі, Маңғыстау бөлімшелік Көліктегі санитарлық-эпидемиологиялық бақылау басқармасы, Бейнеу аудандық медициналық, санитарлық-эпидемиологиялық бақылау мекемелері қатысқан жаттығу карантиндік және аса қауіпті жұқпалы ауруларды анықтаған жағдайда індеттің алдын ала шараларын өткізуге арналған нұсқаулық негізінде ұйымдастырылды. Жолаушылар пойызында мұндай науқастар анықталғанда оны ауруханаға жатқызу, қатынаста болғандарды оқшаулау, зерттеуге арналған материалдарды жинақтау сияқты өзара іс-қимылдар жүзеге асырылады. Өйткені оба – аса қауіпті зоонозды табиғи ошақты карантиндік жұқпалы ауру, – дейді Маңғыстау бөлімшелік көліктегі санитарлық-эпидемиологиялық бақылау басқармасының басшысы Ағзия Темірқасова.
