Семейдегі жүк тасымалы бөлімшесінде көгалдандыру жүріп жатыр
Абай облысы бойынша меншікті тілші
Биылғы жыл семейлік теміржолшылар үшін экологиялық іс-шараларды нақты іспен жүзеге асыру жылы болды десек, қателеспейміз. Бұл орайда филиалдың жүк тасымалы бөлімшесіне қарасты мекемелер жыл басында-ақ атқарылар жұмыстарды пысықтап, жүйелі жоспар құрып, қызу қарқынмен іс бастап кеткен болатын.
Экологиялық қауіпсіздік аясындағы шаралар әсіресе екінші жартыжылдықта жандана түсті. Бөлімше экологы Ерлан Сальевтің жетекшілігімен маңызды жұмыстар атқарылып, желі бойындағы барлық мекемелердің аумақтарында санитарлық тазалық баса назарға алынып, сенбіліктер өткізіліп, теміржол бойы, қос қапталы күл-қоқыстан арылған. Бүгінгі таңда осы шараларға жалпы көлемі мың жарымға жуық теміржолшы қатысып, 6 330 м2 алқап тазартылған. Десек те, жүргізіліп жатқан жұмыстар арасында айналаны көгалдандыру, яғни ағаш отырғызу ісіне басымдық берілуде. Соның аясында теміржолшылар қауымы «Семей орманы» мемлекеттік мекемесі орманшыларының көмегіне сүйене отырып, олардың тарапынан сыйға берілген 145 тал көшетін отырғызыпты. Қазіргі таңда сәнді шыршалар мекемелер аумағына көрік беріп тұр. Бұл шаралар орманшылармен тығыз ынтымақтастық аясында алдағы уақыттарда да осы қарқынмен жалғаса беретін болады.
– Теміржолшылар қауымы арасында экологиялық мәдениет қалыптастыру аса маңызды мәселелер қатарында тұр. Сол себепті бөлімшеміздегі барлық жұмыс орындарында «Экономия-экология. Өндірісте және тұрмыста суды үнемдеудің қарапайым 10 тәсілін қолданыңыз» атты арнайы акция өткізілді. Үгіт-насихаттық сипаттағы материалдар ілінді. Бұл шараның экологиялық қауіпсіздікті сақтаудағы маңыздылығы зор, – дейді бұл орайда Ерлан Сальев.
Сонымен қатар аталған тақырып аясында арнайы техникалық дәрістер өткізіліп, оған желі бойындағы мекемелерде еңбек ететін қызметкерлер қатысқан.
Түйіндей айтқанда, экологиялық қауіпсіздік бағыты бойынша атқарылып жатқан шаралардың қатары артып, ол туралы түсінік те қалыптасып үлгерген.