Қызылордада кәсіподақ күні аталып өтті

Кез келген зайырлы қоғамда әлеуметтік тепе-теңдік пен әділдіктің салтанат құруы жолында еңбек адамының мүддесін қорғайтын кәсіподақтар қызметі елімізде соңғы жылдары күш алып, беделі артып келеді. Қызылорда облысы әкімдігінде Кәсіподақтар күніне арналған шара өтті.    

Салтанатты жиында еңбек адамдарына құрмет көрсетіліп, кәсіподақ белсенділері марапатталды. Қызылорда облысы әкімінің алғыс хаты Қызылорда магистральдық желі бөлімшесінің жетекші инженері Мақсат Тлепбергеновке, Кәсіподақтар федерациясы төрағасының құрмет грамотасы «ҚТЖ-ЖТ» ЖШС «Батыс» филиалы Қызылорда қосалқы бөлімінің кәсіподақ ұйымы төрағасы Мұхтар Көпірбаевқа табыс етілді.

Марапаттарды табыс еткен облыс әкімінің орынбасары М. Шермағанбетов еңбек адамдарының құқығын қорғап, еңбек қатынастарын реттеуде еңбеккер мен жұмыс беруші арасындағы тепе-теңдік деңгейінде диалог орнатуда маңызды роль атқарып, ұжым ынтымағын әлеуметтік тұрғыдан қорғап-қолдап отырған кәсіподақ  ұйымының қызметкерлерін кәсіби мерекелерімен құттықтады.

Келесі сөз кезегін алған облыстың аумақтық кәсіподақтар бірлестігі төрағасы Мақсұт Нәлібаев аймақтағы кәсіподақ ұйымдары тарапынан атқарылған жұмыстарды саралап, жұмыс беруші мен жұмысшы арасындағы алтын көпір сипатындағы кәсіподақ ұйымдарының жұмысына сәттілік тілеп, Қызылорда электрмен жабдықтау дистанциясының электромеханигі Гүлмираш Қоразова, Қызылорда белгі беру және байланыс дистанциясының электромонтерлері Тұрсынкүл Қойбағарова мен Шолпан Арқабаеваны алғыс хатпен марапаттады.  

Қазіргі таңда Қызылорда облыстық аумақтық бірлестігіндегі 12 салалық кәсіподақ ұйымы, оларды 96 мың кәсіподақ мүшесі бар. Салалық кәсіподақ ұйымдары арасында шоқтығы биік теміржолшылардың кәсіби одағы атқарған жұмыстары, ұстанымы мен жұмыс беруші мен еңбеккерді әлеуметтік қолдау тұрғысынан әріптестеріне үлгі.