Семейде «Білім экспресі» семинары өтті

Апта басында Семей қаласында ұлттық компанияның ішкі тренерлерінің ұйымдастыруымен «Білім экспресі» семинар-тренингі өтті.

Екі күн бойы өткен шараға бөлімшенің Семей, Өскемен және Аягөз станцияларынан келген теміржолшылар қатысты. Жалпы саны жүз адам қатысқан семинар-тренинг төрт бағыт бойынша өткізілді. Атап айтсақ, «клиентке бағдарлану», «эмоционалды интеллект», «тиімді коммуникациялар» және «кикілжіңді басқару» тақырыптары бойынша оқыту іс-шаралары ұйымдастырылды. Семинарға негізінен кадр бөлімі, есеп бөлімі, станция және вагон депосының басшысы, аға машинистер қатысқан болатын.  

Екі күнге ұласқан шара барысы мейлінше қызықты әрі тартысты түрде өрбіді. Қатысушылар өзара алты топқа бөлініп, тренерлер берген тапсырмаларды орындап, ой-пікір алмасты. Сонымен қатар жұмыс барысындағы түрлі күрделі жағдайлар кезінде кикілжіңнен шығу, конструктивті диалог құру бойынша мысалдар келтіріп, ортақ талқыға салды.

Мұнымен қоса мейлінше түсінікті тәсілмен, жеңіл тілмен қажетті ақпараттар беріліп, тағылымы мол ойындар, тренингтер де өткізілді. Мәселен, «кикілжіңнен шығу» тақырыбы бойынша дәріс өткізген тренер Жанбота Шакиров жұмыс барысындағы сөзбен іс-әрекетті өзара тиімді қарым-қатынас үстіне құрып, келіспеушіліктің деструктивті арнаға түсіп кетпеуі жөнінде кең көлемде түсінік беріп өтті. Қатысушылар да жұмыс орнында болған оқиғалардан мысалдар келтіріп, кикілжіңнен шығу жолдары жайлы ой бөлісті.  

Екі күнге ұласқан шара соңында барлық қатысушыларға арнайы сертификат берілді.