Маңғыстаулық теміржолшылар алғыс-құрметке ие болды
Маңғыстау облысы бойынша меншікті тілші
Республика күніне орай Маңғыстау темір жолында өткен салтанатты шара марапаттауға ұласып, еңбегі еленген қызметкерлер түрлі дәрежедегі алғыс-құрметке ие болды.
Маңғыстау қосалқы бөлімінің бас ғимаратында мемлекеттік мереке құрметіне ұйымдастырылған салтанатты жиында қосалқы бөлім бастығы Нәжімеден Ғұбашов көпшілікті мемлекеттің ең ұлық мерекесімен құттықтады. Егемендіктің бастауы болған бұл атаулы күннің еліміздің тарихында алатын орнына тоқталып, мемлекетіміздің мерейлі, тәуелсіздігіміздің тұғырлы болуын тіледі. Осы жолда аянбай еңбек етіп, түбек теміржолын дамытуға өз үлестерін қосып жүрген сала қызметкерлеріне алғысын білдірді.
Сала кәсіподағының Маңғыстаудағы өкілі Сәрсенбай Есенқұлов та өз кезегінде көпшілікті құттықтап, жүрекжарды лебізін білдірді.
– Әр мерекенің өзіндік орны бар. Дегенмен Республика күнінің мәртебесі жоғары. Баршаны осы еліміз үшін ең маңызды тарихи күнмен құттықтаймын. Ел экономикасының күретамыры Қазақстан темір жолының дәулетін тасытып жатқан теміржолшылар еңбегі қашан да ерекше алғысқа лайық, – деп атап өтті кәсіподақ өкілі.
Жиын әрі қарай марапаттау рәсіміне ұласты. Бірқатар теміржолшылар «Үздік маман», «Адал еңбегі үшін» төсбелгілерін иеленіп, тағы бірқатары Құрмет грамоталары мен Алғыс хат алды. Жиын теміржолшы өнерпаздардың концерттік бағдарламасымен жалғасты.