Темір жолды құмнан тазалайтын техника жеткізілді

Жақында Бейнеу жол дистанциясына құм тазалайтын техника келіп, жолшылардың қолы ұзарып қалды. Бірнеше жылдан бері құм күреп, жолды тазартып жүрген дистанциялықтар үшін техниканың күші үлкен көмек, біраз жердің қат-қабат құмдарын бір демде қырнап алып, жол табанын аршып кетті.

Соңғы бірнеше жылдан бері, әсіресе ауа-райы алай-дүлей желді Бейнеу өңірінде темір жолды жиі құм басып қалып, жолшылардың жұмысын қиындатып жүргені жасырын емес. Пойыздар қозғалысын қамтамасыз ету үшін қол күшіне зор беріп, темір жолды үйілген құмнан күрекпен аршыған жолшылар үшін бұл да бір міндеттеріне айналғалы қашан. Соның өзінде құм басатын аумақтың ауқымдылығынан жолдың беткі қабатын ғана тазалап үлгеретін. Қырқыншы машиналандырылған жол дистанциясынан жолдың астындағы қиыршық тасты – щебень тазалайтын РМ-80, РМ-2002 техникалары көмекке келіп, біраз жер құмнан толықтай тазарып қалғаны игілікті іс болды.  

– Соңғы бес-алты жылдан бері жазда, күз, көктем, тіпті қар жаумаса қыста да құммен күресіп келеміз. Желдің екпінімен құмды жерлерде шаң-тозаң көтеріліп, темір жолды жауып қалады. Пойыздардың қозғалысына қауіп төндірмес үшін түнімен жолды құмнан тазалау жұмыстары жүргізілетін кездер болады. Құмның жайы күрделі мәселеге айналып кетті. Биыл басшылардың шешімімен машиналандырылған жол дистанцияларынан арнайы техникалар келіп, жұмысымызды жеңілдетіп жатыр. Жол техникаларының көмегімен біраз жерді тазартып алдық. Алдағы уақытта осылай техника күшін пайдаланып, жылдар бойы жиналып қалған құмдардан құтыламыз деген ойдамыз, – дейді Бейнеу жол дистанциясының бастығы Ерназар Ізтұрғанов.  

Айтуынша, Самның айналасында 23 шақырымдай аумақты құм басып жатқан. Техниканың күшімен соның 12 шақырымға жуығы тазартылған. Бұл техникалар қыркүйек айының ортасында келіп жұмысқа кірісіп, қазанның сегізіне дейін жұмыс істеген.  

– Самның басында жұмыс істейтін жігіттеріміз құм тазалаудан қолдары босамайды. Жол шебері Аманқос Қожабаевтың басшылығымен осы учаскедегі жол қауіпсіздігін қамтамасыз етіп отыр. Құммен күреске қосымша алты жол жөндеуші алынған. Бұл алтаудың күші жетпеген кезде жолды ағымдағы күтіп ұстауға арналған 10 жол жөндеуші жұмылдырылады, – дейді Сам-Теректі, Сам-Ноғайты перегондары бойынша телім бастығы Айбек Оразбаев.