Теміржолшылардың ғимараты мектеп балансына берілді
Маңғыстау облысы бойынша меншікті тілші
Болашақ станциясы салынғалы ауыл халқы жылдан жылға көбейіп, тұрғындардың әлеуметтік сұраныстары да артып келеді. Мысалы, мектептегі бала санының өсуіне байланысты қосымша ғимарат Маңғыстау магистральдық желі бөлімшесінің қолдауымен шешімін тапты.
Бөлімшенің Болашақтағы 50 орындық асхана ғимараты мектептің балансына беріліп, бастауыш сыныптар үшін қосымша бөлмелер ашылды. Осыған дейін теміржол балансында болған нысан бюджет қаржысы есебінен толықтай жөндеуден өткізіліп, оқу ордасының талабына сай, оқушыларға ыңғайлы етіп қайта жасақталды. Қажетті құрылыс-жөндеу жұмыстары аяқталысымен оған бастауыш сынып оқушыларын көшіру жоспарланған болатын. Өткен аптада ғимараттың тұсауы кесіліп, оқушылар жаңа тоқсанды жаңа сыныптарда бастады. Ашылу рәсіміне теміржол басшылары, ардагер ұстаздар, ауыл халқы қатысты.
– Биылғы оқу жылында мектебіміздегі балалар саны 179-ға жеткеннен кейін 80 орындық мектепте үш ауысыммен оқу ықтималдылығы туындады. Сондықтан жергілікті әкімдік пен теміржол басшыларына шығып, асхана ғимаратынан қосымша сынып бөлмелерін ашуға өтініш қылғанбыз. Бұл ұсынысымыз теміржол және билік тарапынан қолдау тауып, араға сегіз ай салып реконструкциялау мен толық жөндеуден өткен ғимарат пайдалануға беріліп отыр. Міне, бүгін бастауыш сыныптар осында көшіріліп, кең де жарық су жаңа ғимаратта оқитын болғанына бәріміз қуаныштымыз, – дейді зейнеткер ұстаз Алым Мухизов.
Жаңа ғимаратқа бастауыш кластардың 92 баласы ауысқан соң негізгі мектеп жүктемесі айтарлықтай жеңілдеген.