Бейнет түбі – зейнет

Атырау белгі беру және байланыс дистанциясында тұп-тура 40 жыл еңбек еткен  Шолпан Туманова зейнет жасына жетіп отыр. Өткен аптада әріптестері онымен қимай қоштасып, көп жылғы еңбегіңіздің жемісін көріңіз деген тілекпен шығарып салды.  

Жастайынан бүкіл өмірін темір жолға арнап, соның ыстығына күйіп, суығына тоңып еңбек еткен Шолпан 1962 жылы Гурьев қаласында дүниеге келген. 1979-1983 жылдар аралығында Алматы қаласындағы теміржол көлігі инженерлері институтында білім алып, «Автоматика, телемеханика және байланыс» мамандығы бойынша бітіріп шығады. Еңбек жолын  Гурьев, қазіргі Атырау белгі беру және байланыс дистанциясында СОБ электромонтері болып бастаған күні бүгінгідей есінде. Атырау мен Дина Нұрпейісова станциясы аралығындағы СОБ қондырғыларының жұмысын, автоблоктау, байланыс жүйелерінің тұрақты қызмет жасауын қамтамасыз ететін дистанцияда 15 жылдай электромеханик болып еңбек еткен Шолпан 1998 жылы дистанция бастығының кадрлар жұмысы бойынша көмекшісі болып тағайындалады. Бірнеше жылдан кейін жұмысты ұйымдастыру және нормалау бойынша инженер-экономист қызметін атқарады. Ал зейнеткерлікке дистанцияның персоналдармен жұмыс бөлімінің менеджері лауазымынан шығып отыр.  

– Ол – өз жұмысын жақсы ұйымдастыра білетін сауатты маман. Оның іс тәжірибесі семинарларда көрсетіліп, басқаларға үлгі ретінде таратылды. Оңтайландыру саясатына байланысты Атырау жүк тасымалы бөлімшесінің 40 маманын дистанцияның СОБ электромонтері қызметіне ауыстыру жұмыстары да осы кісінің жауапкершілігімен өте тиімді жүргізілді, – дейді Атырау магистральдық желі бөлімшесінің персоналдармен жұмыс бөлімінің бастығы Анар Жалғаспаева.  

Шолпан Туманова теміржол саласының дамуына қосқан елеулі үлесі үшін «Болат жолдың даңқты еңбеккерлері-2012» Құрмет кітабына енгізіліп, 2021 жылы «Адал еңбегі үшін» төсбелгісімен марапатталған. Отбасында бала-шаға өсіріп, немере сүйіп отырған асыл ана. Ұжымдастары оны зейнет жасына жетуімен құттықтап, ұзақ жыл бірге болған әріптестерімен қимай қоштасты.