Абырой арқалаған жандар

Өткен жыл маңғыстаулық теміржолшылар үшін табысты да мерейлі жыл болды. Қаншама азамат салалық деңгейде түрлі марапаттың иегері атанса, енді біреулері жергілікті билік тарапынан құрметке бөленді.

«Батыс» жолаушылар тасымалының Маңғыстау телімін басқарып отырған Қалиолла Сахипов былтырғы төл мерекеде Құрметті теміржолшы, ал жыл соңында Мұнайлы ауданының Құрметті азаматы атанды. Саладағы жұмысын 1991 жылы Маңғыстау станциясында пойыз құрастырушы болып бастаған теміржолшы әр жылдары Бейнеу станциясында бас инженер, Маңғыстау станциясында бас инженер, Ералы станциясы бастығы қызметтерін атқарған.  

Ал Бейнеу станциясы бастығының орынбасары Нұрмұханбет Жандәулетов былтыр Бейнеу ауданының Құрметті азаматы және «Кәсібі бойынша үздік» атанып, мерейі үстем болды. Қазақ көлік академиясының тасымалды ұйымдастыру және басқару факультетін бітіріп, Ералиев және Бейнеу станциясына жүк қабылдаушы, аға жүк қабылдаушы, ПКО бригадирі болды. Жүк тасымалы ауданының Бейнеу агенттігін басқарды. 2003 жылдан бері Бейнеу станциясы бастығының логистика жөніндегі орынбасары, «Адал еңбегі үшін» төсбелгісінің иегері.  

Жаңаөзендік Амандық Аралбеков Батыс өңіріне танымал теміржолшылар әулетінің өкілі. Былтыр «Құрметті теміржолшы» белгісімен марапатталды, теміржолдағы еңбек өтілі қырық жылдан асады. Мақатта айналым депосына машинист көмекшісі, машинист болды. Одан кейін машинист нұсқаушысы, Әйтеке би станциясында айналым депосы бастығы, Маңғыстау депосында бастықтың орынбасары секілді еңбек сатыларынан өткен. 2014 жылдан бері Маңғыстау локомотив депосы бастығының Жаңаөзен айналым депосындағы орынбасары.  

Маңғыстау жол дистанциясының Шетпе телімін басқарып отырған Қабыл Заиров үшін де жыл мерейлі болды. Тарлан теміржолшы саладағы үлкен марапат – Құрметті теміржолшы белгісіне ие болды. Ал талай жылдан бері кәсіподақ саласында тер төгіп келе жатқан Әзірбай Тұрмағанбетов былтыр Мұнайлы ауданының Құрметті азаматы атанды.