Теміржолшылар темір жол бойын қардан тазартуда
Атырау облысы бойынша меншікті тілші
Теміржолшылардың қысы-жазы ауа-райының қас-қабағына қарап қимылдайтыны аян. Жазда жолды құмнан, қыста қардан аршып тазалау – Атырау өңірі теміржолшылары үшін үйреншікті тірлік.
Қараша-желтоқсанда 7-8 градус жылы болған аймақта қаңтар айында қыс қаһарына мініп, күн суытты. Жуырда жауған қар жартылай еріп, мұзға айналды. Соған орай, екі-үш күннен бері темір жол бойын қардан тазарту жұмыстары өңірде қарқынды жүріп жатыр.
– Қар қалың жауған жоқ, бірақ ұйытқып соққан боранды желдің әсерінен қардың темір жол бойын бітеп тастайтын әдеті ғой. Сондықтан қар жауған күннен бастап Дина Нұрпейісова станциясынан Сағызға дейінгі жолды өз күшімізбен тазалауға кірісіп кеттік. Күніне осы жұмысқа адамдарды бөліп отырмыз. Сондай-ақ қар тазалайтын СМ-2, СЗПМ сынды арнаулы 11 техника-машинамыз да бар. Ең алдымен Мақат, Атырау, Ақжайық, Махамбет, Құлсары, Аққыстау сынды үлкен станцияларды, сосын Ескене, Мұқыр, Жантерек, т.б. бекеттерде қардан тазарту жұмыстарын жүргізудеміз, – дейді Атырау жол дистанциясы бастығының өндіріс жөніндегі орынбасары Аманқос Жылқыбаев.
Атырау қосалқы бөлімшесі басшысының «2023-2024 жылға қысқы мерзімге арналған қармен күрес жұмыстарын жүргізу» жедел жоспарына байланысты барлық станция бекеттерде де қар тазалау жұмыстары назарға алынған.
– Ауысымда жүрген жігіттерді бұйрық бойынша қар тазалау жұмыстарына тартып жатырмыз. Әзірге көп қар жоқ, дегенмен жолды аршу жұмыстары үнемі қадағаланып отыр, – дейді Атырау станциясының бастығы Алтай Көбегенов.