Студенттер өндірістік тәжірибеден өтіп жатыр
Маңғыстау облысы бойынша меншікті тілші
Ақтау көлік колледжінде студенттердің білімін тәжірибемен ұштастыру жолға қойылған. Бүгінгі таңда бір топ студент Маңғыстау магистральдық желі бөлімшесінде тәжірибе жинақтауда.
Колледждің 3-курс студенттері ұстаздары Саламат Хасайновтың жетекшілігімен белгі беру-байланыс дистанциясының СОБ құрылғыларын диагностикалау цехында өндірістік тәжірибеден өтуде. «Автоматика, телемеханика және теміржол көлігінде қозғалысты басқару» мамандығы бойынша білім алатын олар мұндағы түрлі құрылғыларды көріп, жұмыс үдерісімен танысып, біліктілігін арттыруда. Мысалы, студенттер заманауи жаңа КПР-СЦБ релесін тексеру кешенімен танысып, диагностикалаудың жаңа технологиясын үйренді. Сонымен қатар СОБ құрылғыларының бөлшектерін технологиялық талаптарға сай жөндеу мен жинау, техникалық қызмет көрсетудің қыр-сырын меңгеріп, аға-апаларынан дәріс алуда.
– Оларға жұмыс барысын түсіндіріп, өндіріске баулып үйретеміз. Алдымен оларға техникалық қауіпсіздік туралы ақпарат беріп, бәрінен бұрын қауіпсіз еңбек етуді ескертеміз. Мұндағы техникалық бөлшектер қалай жұмыс істейді, оларды қолдануда қандай «нюанстарға» тап болу мүмкіндігі, қиындықтар туралы ақпарат береміз. Еңбекке араласқан кезде алдымен нені біліп, бекеттерде қалай жұмыс атқару қажеттігін үйретудеміз. Біздің дистанция бір шеті Бейнеу, екіншісі Болашаққа дейінгі аралықтағы қызмет көрсетудің ерекшеліктері қандай, қандай приборлармен жұмыс жасаймыз, бәрімен бүгін таныса бергендері дұрыс, – дейді Маңғыстау магистральдық желі бөлімшесінің белгі беру және байланыс дистанциясының телім бастығы, 1990 жылдан бері осы салада тер төгіп келе жатқан тәжірибелі маман Аманберді Лесбай.