Байланыс дистанциясы тосын жағдайлардың орын алуына жол бермеді
Қызылорда облысы бойынша меншікті тілші
Қызылорда белгі беру және байланыс дистанциясының ұжымы өткен жылы пойыздар қозғалысында қауіпсіздіктің сақталуына өз үлестерін қосып, тосын жағдайлардың орын алуына жол бермеді.
Дегенмен дистанциялықтар барлық жұмыс техника мен құрылғылардың сенімділігіне байланған салада болуы мүмкін күтпеген жайттар орын алуы мүмкін екенін жасырмайды. Дистанция басшылығы кез келген жағдайда қиындықтан жол таба білетін ұжымның тәжірибелі мамандарының шеберлігіне сенімді.
– Дистанцияның төрт жүз шақырымнан асатын пайдалану аумағындағы байланыс құрылғыларының күнделікті кідіріссіз жұмыс жасауы біз үшін бірінші кезектегі Телімдердегі байланыс құрылғылары, СОБ, автобұғаттау нысандары, диспетчерлік және электрлік орталықтандыру желілері және өзге де құрылғылардың жұмыстан тыс қалмауы жұмысымызға сын болады. Сондықтан байланыс тетіктерінің талапқа сай жұмыс жасауы үшін күні-түні жұмыс жасаймыз, кемін толтырамыз, ақауын жөндейміз. Теміржол саласында сәл ғана ағаттық бүкіл ұжымның жұмысын еш қылуы мүмкін болғандықтан «теміржолда кішкентай нәрсе болмайды» қағидасымен жұмыс жасауға үйренгенбіз. Жалпы өткен жылы жоспарланған жұмыстардың дені орындалды, – дейді техникалық бөлім басшысы Нұрлан Жүсіпбаев.
Өткен жылдың соңғы тоқсанында байланыс құрылғыларының бабын жасауда біршама ауқымды жұмыстар атқарылыпты. Жұмыстың дені дистанция телімдерінде жасалынған. Мәселен, Шиелі станциясындағы маневрлік М46 мен М32 бағдаршамдарының қондырғылары жаңартылса, 16-бекетте диспетчерлік орталықтандыру желісіндегі кіріс бағдаршамы Ч жәшігінің кабельдік қорабы алмастырылған. Қызылорда мен Шиелі станцияларында 10 бағыттамалы бұрманың электрлі жетегі монтаждалған. Белкөл – Бірқазан станциялары аралығындағы ШРУ релелік шкафының №2/9 сигнал нүктесі ШРУ-М шкафымен жаңартылған. Шорнақ – Түркістан станциялары аралығындағы екі жолақты дұрыс емес жолда қозғалысты уақытша реттеу Шалқар тәсілімен ұйымдастыру сызбасы әзрленіп, тақ және жұп бағыттағы қозғалыс АЛС сигналдарымен реттелген. Телімнің 3084 шақырымдағы өткел шлагбаумының ПАШ типті электрожетегі ауыстырылыпты. Осындай ағымдық күтім, құрылғылардың технологиялық талапқа сай бабын жасау жұмыстары биылғы жылдың да басты жоспарында тұр.
