Қоғамдық тәртіптің сақталуы маңызды (Фото)
Маңғыстау облысы бойынша меншікті тілші
Түбекте теміржол аумағында, жолаушылар пойыздарында қоғамдық тәртіптің сақталуын қадағалап, түрлі заң бұзушылықтардың алдын алуға «Тасымалдаушы» жедел профилактикалық іс-шарасы ұйымдастырылды.
Сай-Өтес станциясындағы желілік полиция бөлімшесінің қызмет ету аумағында өткен іс-шара барысында бөлімше инспекторлары станцияға аялдаған жолаушылар пойыздарының жолсеріктерімен және жолаушыларымен кездесіп, жолда қозғалыс қауіпсіздігін сақтау және заңсыз жолаушы мен жүк тасымалын болдырмау, т.б. қажетті ақпараттар берілді. Түрлі ситуацияларға қатысты түсіндіру жұмыстарын жүргізді.
– Жолаушылар пойыздарында, қоғамдық орындарда қылмыстардың алдын алу, жолын кесу және әкімшілік құқық бұзушылықтарды анықтау бағытында ұйымдастырылған «Тасымалдаушы» іс-шарасы кезінде пойызда құқықбұзушылыққа қатысты бірнеше фактілер анықталып, қажетті шаралар қолданылды. Іс-шараға бөлімшеден 5 инспектор, теміржол әскери күзетінен 2 күзетші жұмылдырылды, – дейді бұл туралы Сай-Өтес станциясындағы желілік полиция бөлімшесінің басшысы Нұрлыбек Рахметов.
