Қос теміржолшы құрметті демалысына шықты
Маңғыстау облысы бойынша меншікті тілші
Маңғыстау темір жолының қос бірдей майталманы, бүкіл ғұмырын локомотив шаруашылығына арнаған Бейнеу айналым депосының телім бастығы Жолдас Есбосынов пен тепловоз машинисі Қаныбек Сейдалиев зейнеткерлік демалысқа шықты.
Маңғыстау локомотив депосының, Бейнеу айналым депосының ұжымы мен кәсіподақ ұйымы қос теміржолшыны зейнет жасына жетуімен құттықтап, еңбегіне алғыс айтты. Иығына шапан жауып, естелік сыйлықтармен құрметтеп шығарып салды.
Жолдас Закарияұлы Бейнеу теміржолында қырық жылдан астам еңбек етті. Еңбек жолын сонау 1983 жылы Бейнеу станциясындағы ТЧ-15 Бейнеу локомотив депосының ТҚК-2 цехында тепловоз жөндеуші болып бастаған еді. Екі жылдан соң ауысым шебері міндетін қолына алады. Сосын аға шебер қызметіне тағайындалды. 2004 жылы «Локомотив сервис орталығы» АҚ-ның «Маңғыстау локомотив сервис орталығы» Бейнеу учаскесінде директордың орынбасары болды. Аталған орталық жабылған соң Бейнеу айналым депосында телім бастығы болып күні бүгінге дейін жемісті еңбек етті.
Осы деподағы талай жас буынның қанаты қатайып, нағыз теміржолшы болып тәрбиеленуіне атсалысты. Екі бірдей ұлын жеткізіп, депо ұжымының қатарына қосты. Қазір бірі ТҚК-2 цехында аусым шебері болса, екіншісі көмекші машинист.
Қаныбек Сәбитұлының да локомотив шаруашылығындағы орны бір төбе. Ол депода қарапайым құм жабдықтаушыдан 3-ші класты тепловоз машинисіне айналғанша талай жолдан өтті. 1985 жылы ТЧ-15 Бейнеу локомотив депосында құм жабдықтаушы болып жұмысқа орналасып, бір жылдан соң әскери борышын өтеуге кетеді. Әскери өмірде шыңдала түскен жас жігіт бұрынғы жұмысына қайта оралғасын ТҚК-2 цехында тепловоз жөндеуші болды. Жөндеп жүріп тепловозға «ғашық болып», бір күні осы алып көлікті өзіне бағындырып, оны тізгіндеуді алдына мақсат етеді. Соған сай отарбаның қыр-сырын толық меңгерді. Арнайы курста оқып келген соң тепловоз машинисінің көмекшісі ретінде алғашқы жолсапарға аттанады. 2005 жылдан бастап тепловоз машинисі міндетін атқарып, Маңғыстау – Сай-Өтес, Маңғыстау-Жаңаөзен станциялар аралығында жүк пойыздарын тасымалдады.
Әріптестерінің айтуынша, Қ.Сейдалиев ұжымдағы іс-шаралармен белсене атсалысады, жас машинистерді жұмысқа баулып, кәсібінің ыстығы мен суығына төзе білетін нағыз маман ретінде қалыптастыруға атсалысты. Үлгі боларлық тәжірибелі маман.
