Жедел жәрдем фельдшері ауыр науқасқа дрезинамен жетті
Абай облысы бойынша меншікті тілші
Өткен аптада ел шығысындағы қатты аяз бен қалың қарға байланысты теміржолшылар ғана емес, жедел медициналық жәрдем қызметі де күшейтілген жұмыс режиміне көшіп, бір-біріне көмек қолын созуда.
Мәселен, шалғай елді мекендегі ер адамға шұғыл медициналық көмек қажет болып, Асубұлақ ауылындағы жедел жәрдем қызметкерлері теміржолшылар көмегіне сүйенуге мәжбүр болды. Жедел жәрдем фельдшері ауыр науқасқа дрезинамен жетті. Себебі қалың қар мен 40 градустан асатан үскірік аяз автокөлік пен ат шананың жүруіне мүмкіндік болмады.
Жергілікті подстанцияның аға фельдшері Ғалия Ерғалиева мен фельдшер Ердәулет Әділханов ауылдық әкімдік пен полиция қызметкерлерінің сүйемелдеуімен Өскемен-1-Огневка-Серебрянск бағыты бойынша теміржол желісін тексеретін дрезина вагонға отырды. Теміржолшылар және тәртіп сақшылары ақ халаттыларға көмекетесіп, науқасты облыстық ауруханаға жеткізді. Дәрігерлер де, науқас та қиын-қыстау сәтте көмекке келген жандарға алғыстарын білдіруде.
Тоқтала кетсек, өткен аптада аймақтағы барлық күштік құрылымдармен қатар бөлімше қызметкерлері де шұғыл әрекетке көшіп, төтенше жағдайлар департаменті және коммуналдық қызмет мамандарымен бірлесе әрекет еткен. Ауа райы болжамы бойынша шығыс өңірінде осы аптада аяздың беті қайтады.