Талас станциясынан 24 арнайы ауыр техника тиеген құрам жолға шықты
"Қазақстан теміржолшысы" газетінің Жамбыл облысындағы меншікті тілшісі
«ҚТЖ-Жүк тасымалы» ЖШС – «Жамбыл ЖТ бөлімшесі» филиалы Атырау облысындағы су тасқынына қарсы күреске техникалардың алғашқы легін жөнелтті.
Сенбі күні Талас станциясынан 24 арнайы ауыр техниканы тиеген құрам жолға шықты. Ал жексенбі күні станция теміржолшылары қосымша тағы 18 техниканы платформаларға тиеп, жолға салып жіберді.
– Жамбыл жүк тасымалы бөлімшесі екі лекпен жіберген жүк пойызында бөген салу жұмыстарына аса қажет самосвал, тракторлар, жүк көліктері, бірнеше экскаватор бар. Сондай-ақ тұрғындар мен жұмысшыларды тасуға арналған автобустар мен «Нива», «Жедел жәрдем» көліктерін де жіберіп отырмыз. Бұл – облыс әкімдігі мен жергілікті ірі өндіріс орындары, зауыттар басшыларының, бизнесмендердің қолға алуымен жасалып жатқан жұмыстар нәтижесі. Біздің міндетіміз – барлық жүкті шашау шығармай жеткізу. Тасқын суға қарсы күреске, қалпына келтіру жұмыстарына үлес қосу – баршамыздың парызымыз, – дейді Жамбыл ЖТ филиалынынң директоры Айдын Сейітбенбетов.
