Жамбылдық теміржолшылар мектеп түлектерімен кездесті
"Қазақстан теміржолшысы" газетінің Жамбыл облысындағы меншікті тілшісі
Жамбыл ЖТ бөлімшесі мен Жамбыл магистральдық желі бөлімшесінің мамандары Тараз қаласындағы №8 гимназиясын бітіруші түлектермен және олардың ата-аналарымен кездесу өткізді.
Дәл қазіргі сәт – мектеп түлектері үшін болашаққа таңдау жасайтын аса маңызды кезең. Осындай шақта кәсіби бағдар берудің жастардың дұрыс шешім қабылдауына ықпал етері анық. Кездесуде Жамбыл локомотив пайдалану депосының 2-класты машинисі Ғани Серікбаев өз мамандығы туралы әңгімелеп, мультимедиялық тәжірибелік сынақ көрсетті. Жамбыл магистральдық желі бөлімшесінің персоналды басқару бөлімінің басшысы Назгүл Кекежанова, ПЧ-51 Жамбыл жол дистанциясының кадрлар жөніндегі менеджері Индира Қоңқашева теміржол саласында қандай мамандықтар сұранысқа ие екенін айтып, көпшілік сұрақтарына жауап берді.
Ал ШЧ-36 Жамбыл белгі беру және байланыс дистанциясы директорының орынбасары Азамат Найманов теміржолдағы жастардың қызығушылығын туғызатын мамандықтар туралы әңгімеледі.
– Уақытпен бірге дамып келе жатқан теміржол – сенімді жұмыс орны және тұрақты табыс көзі. Салада ертеден келе жатқан мәнін жоймайтын кәсіптер көп, сонымен қатар логистика, цифландыру сынды болашақтың мамандықтары да пайда болуда, – деді Азамат Маратұлы.
Түлектерге кәсіби бағдар беруді көздеген жиынға Тараз теміржол көлік және коммуникация колледжі директорының оқу-өндіріс ісі жөніндегі орынбасары Ж.Тайбеков, арнайы пән оқытушысы Т.Ділдәбеков те қатысып, ата-аналарға оқу орнында оқытылатын теміржол мамандықтары туралы жан-жақты ақпарат берді. Іс-шараны Көлік министрлігінің Автомобиль көлігі және көліктік бақылау комитетінің Жамбыл облысы бойынша көліктік бақылау инспекциясы ұйымдастырды.
