Үшінші буын өкіл

Ақтөбе магистральдық желі бөлімшесі Шалқар белгі беру және байланыс дистанциясының электромеханигі Жәдігер Асанбаев 40 жылдан аса уақыт бір жерде тапжылмай еңбек етіп келеді.

«Мен қарапайым теміржолшының ұлымын. Және оны әрдайым мақтан етемін. Әкем де, атам да жолшы болған. Мен үшінші буынмын. Әкем 40 жасында өмірден өтті. Атам 43 жыл Көпмола бекетінде жолшы болды. Қазақ жеріне келген теміржол құрылысына қатысқан, көзімен көрген ардагер. Солардың әңгімесін тыңдап өстік. Мамандыққа деген мақтанышымыз бала кезден сүйегімізге сіңген», – деді Жәдігер Асанбаев.

Жәдігер Әмиятұлы 1962 жылдың 5 тамызында Көпмола бекетінде дүние есігін ашыпты. Сол жерде білім алып, балалық шағы да теміржол бойында өткен. 1983 жылдың ақпанында әскерден оралған соң Көпмоладағы белгі беру және байланыс дистанциясында жұмысқа орналасады. Орал қаласында бір жыл оқып курсты бітіріп, мамандығына сай білім алады. Содан бері тапжылмай Шалқар белгі беру және байланыс дистанциясының электромеханигі болып еңбек етуде. 41 жыл ішінде бірде бір ескерту алмаған, ақау жібермеген.

Міндетіне вагон доңғалағының КТСМ бойынша жағдайын тексеру кіреді. Көпмола станциясы бойынша 90 шақырымға жауапты. Вагон доңғалағының қызуын, қалыпты қозғалысын тексереді. Шамамен бір айда мыңнан аса вагон доңғалағының қызуын тексереді.

«Вагон доңғалағының қызуы 140 градустан асса, тоқтатамыз. Біз үшін жүктің, жолаушының қауіпсіздігін сақтау маңызды. Белгі беру және байланыс дистанциясы теміржолдың күретамыры іспеттес. Байланыссыз қалса, қозғалыс та жоқ, пойыздар тоқтайды. Маған жүктелген міндеттің жауапкершілігін бірінші күннен түсіндім», – дейді кейіпкеріміз. 

Шалқар белгі беру және байланыс дистанциясы – байланыс пен СОБ құрылғыларының ақаусыз, үздіксіз жұмыс істеуін қадағалап, пойыздардың қозғалыс қауіпсіздігін қамтамасыз етіп отырған тарихы терең байырғы мекеме.