Темір жол – қауіпті аймақ ошағына айналып отыр...
Түркістан облысы бойынша меншікті тілші
Шымкентте «Темір жолдағы қауіпсіздік. Рұқсат етілмеген жерден өтудің алдын алуға қатысты профилактикалық жұмыстар» тақырыбында дөңгелек үстел өтті. Басқосуға жергілікті аймақ теміржолшыларынан бөлек, желілік полиция бөлімдерінің жетекшілері мен көлік прокуратурасының өкілдері қатысты.
«ҚТЖ-Жүк тасымалы» ЖШС Шымкент филиалының бас инженері Ілияс Нұржанов жетекшілік еткен жиында теміржолда келеңсіз оқиғалардың алдын алу мен профилактикалық жұмыс жүргізудің жай-күйі талқыланды. Атап өтерлігі сол, Шымкент жол бөлімшесінде аталған бағытта жұмыс жүргізудің негізгі жоспары бекітілген. Соның аясында өңір теміржолшылары желілік ішкі істер бөлімінің өкілдерімен бірлесе отырып, ай сайын теміржол маңындағы келеңсіз оқиғалардың алдын алу мақсатында арнайы профилактикалық шаралар ұйымдастырып тұрады. Жиынға қатысушылар, жыл басынан бері 188 рейдтік тексеріс ұйымдастырылып, 92 құқық бұзу фактісі тіркелгенін атап өтті. Осы орайда құқық қорғау органдарының өкілдерімен бірлесе отырып, құқықбұзушыларға түсіндіру жұмыстары жүргізілген және заңға сәйкес, айыппұлдар салынған.
Сонымен қатар осы кезге дейін теміржолға жақын маңда орналасқан елді мекен тұрғындарымен 232 кездесу өткізілген. Оған қоса түрлі оқу орындарында 134 түсіндіру шарасы ұйымдастырылып, азаматтарға теміржолдан қауіпсіз өту ережелері туралы айтылған. Сол сияқты теміржол бойында телефонмен сөйлесіп немесе құлаққаппен жүру, қызық үшін сельфилетіп суретке түсу мен балаларға сол маңда ойнаудың қауіптілігі кеңінен түсіндірілген.
– Өкінішке орай, осындай ауқымды жұмыстар іске асырылып жатқанымен көрсеткіш көңіл көншітерліктей емес. Тіркелген келеңсіздіктерді саралайтын болсақ, азаматтардың немқұрайлығы мен қауіпті аймақтан өтуге салғырт қарауының соңы қайғылы жағдайға соқтыруда. Әсіресе кей азаматтардың спирттік ішімдік ішіп, рұқсат етілмеген жерлерден өтуге ұмтылуы өзекті мәселеге айналуда, – дейді Ілияс Бахрамұлы.
Шымкенттік теміржолшылардың айтуынша, бүгінгі таңда Шымкент, Қызылсай, Сарыағаш, Манкент, Бадам, Арыс, Дарбаза станциясы маңындағы темір жолға бөгде адамдардың шығып кету қаупі жиілеген көрінеді. Ал Састөбе, Бадам, Игілік, Монтайтас, Жылға, Темір және Қарақоңыр сынды станция аумақтарында қараусыз малдан келер қауіп-қатер сейілмей тұр. Осының салдарынан темір жол қауіпті аймақ ошағына айналып отыр.
Санаулы күндерден соң кезекті оқу жылы басталатындықтан өңір теміржолшылары жол бойында қауіпсіздікті күшейту мақсатында белсенді жұмыс жүргізуге ден қойған. Станцияларда ұйымдастырылатын ай сайынғы комиссиялық байқау кезінде адамдар жиі өтетін тұстардағы дыбысзорайтқыш құрылғылардың қалыпты жұмыс істеуін тексеріп, мал өткізбейтін қоршаулар қауіпті аймақты ескертетін тақтайшалардың бар-жоғын қадағалауды қатаң түрде қолға алуда.
