Депутаттар теміржолшыларды референдумға қатысуға шақырды

Шығыстағы теміржолшылар қауымы еліміздің қоғамдық-саяси өміріне белсене араласып, ешбір шарадан шет қалған емес. Жуырда Жаңғызтөбе станциясында 6 қазан күні өтетін жалпыұлттық референдум жайлы кең көлемді талқылау болды.

Расын айтсақ, қырық жыл атом сынағының зардабын тартқан Семей өңірінің жұртшылығы үшін «атом» сөзі әлі де болса көңілге үрей салатыны жасырын емес. Сондықтан АЭС құрылысы бойынша өтетін референдум, жалпы облыс көлемінде жасыл экономикаға жататын аталмыш құрылыс туралы түсіндіру, ақпараттандыру шаралары кең көлемде жүргізілуде.  

Жаңғызтөбе вокзалында басқосуға «Amanat» партиясының облыстық филиалының төрағасы, Шар өңіріндегі теміржолшылар станциясының тумасы Қуаныш Сүлейменов, Жарма аудандық мәслихатының депутаты, Жаңғызтөбе станциясының бастығы Азамат Нұрғалиев бастаған қоғам белсенділері, теміржолшылар қауымы қатысты.  

Жиын барысында Мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауы жайлы сөз қозғалып, АЭС құрылысы бойынша кең көлемде түсінік берілді. Теміржолшыларды алдағы өтетін референдумға бір кісідей қатысып, тарихи шешім жасауға шақырды.

– Атом электр станциясының құрылысы Қазақстанның энергетикалық балансындағы көмір энергиясының үлесін азайтады. Бұл қазіргі уақытта әлемдегі ең жоғары энергия көзі болып табылады. Осылайша, атом электр станциясының құрылысы 2060 жылға қарай көміртегі бейтараптығына қол жеткізу стратегиясын жүзеге асырудың негізгі қадамы болмақ, – деді өз сөзінде Қуаныш Сүлейменов.  

Жиын барысында теміржолшылар тарапынан көптеген сауалдар қойылып, спикерлер барлық сұрақтарға жауап берді. Дәл осындай кездесу Шар теміржол торабында да өтті. Бөлімше бойынша ақпараттандыру жұмыстары жалғасуда.