Жат ағымнан сақтандырды
Абай облысы бойынша меншікті тілші
Теміржолдағы жастар қауымы үшін танымдық-тағылымдық мақсаттағы және ақпараттық тұрғыдан берері мол жиындар соңғы уақыттарда көптеп өткізілуде.
Қыркүйек айында Аягөз аудандық дін мәселелерін зерттеу орталығының теолог маманы Мұрат Жанатаев «Жат ағым» тақырыбы аясында бірқатар теміржол мекемелерінде болып, ақпараттық-түсіндіру жұмыстарын жүргізді. Мақсат – теміржолшыларды жат ағымдардан сақтандыру, өңірдегі діни экстремизм көріністерінің алдын алу. Мұндай ақпараттандыру жұмысы Аягөз белгі беру және байланыс дистанциясы мен ТЧЭ-25, ПЧ-42 мекемесінде, сонымен қатар «Қамқор вагон» ЖШС-ның Аягөз филиалында және Аягөз станциясында ұйымдастырылды.
Жиындар барысында террористік тұрғыдан осал нысандардағы лаңкестік шабуыл жасау қаупі кезіндегі іс-қимыл ережелері де түсіндірілді. Дәстүрлі емес діни ағымдардың өз қатарларын толықтырудағы психологиялық әдіс-тәсілдері туралы да кеңінен ақпарат берілді.
Жалпы, Аягөз – аймақ бойынша діни ахуал аса құбылмалы өңірлердің бірі екендігі жасырын емес. Осыдан біраз жыл бұрын экстремистік идеялардың ұшқыны байқалып, дер кезінде тазартылған болатын. Діни радикализмді жұқтырып алған албырт жастардың арасында теміржолшылардың болғаны да рас. Осы орайда алдын алу шараларының берері зор екендігі анық.
– Арандатушылық әрекеттерге жол бермеудің маңыздылығы зор. Осы орайда діни алауыздық пен радикализмнің жолына тосқауыл қойып, экстремизм мен лаңкестік көріністеріне жол бермеуде дінтанушы теологтармен бірлесіп жұмыс жүргізілуде, – дейді бұл орайда пікір білдірген Аягөз жол дистанциясы бастығының орынбасары Болат Мұстафаев.