Мақатта перрон салынды

Бірнеше бағытқа қызмет көрсететін тоғыз жолдың торабы Мақат станциясында вокзал маңын қайта жаңғыртып, жаңадан перрон салынды.    

Жолаушыларға қызмет көрсететін 50 орындық Мақат вокзалы 1966 жылы салынған, бірақ 2014 жылы жөндеуден өтіп, қазіргі кейпі жаман емес. Әйтсе де, станция тұрғындары мен жолаушылар перронның қолайсыздығы туралы жергілікті атқару органдарына және темір жол басшыларына көптен айтып келеді. Пойызға мініп-түсу қолайсыз, өте төмен. Вокзал аймағы да жазда құм, қыста балшық-сор болып жатады. Сол себепті облыс әкімдігі вокзал маңын қайта абаттандырып, жаңа перрон салу үшін жобалау-сметалық құжаттамасын жасап,  мемлекеттік сараптамадан оң қорытындысын алған болатын.  

Атырау магистральдық желі бөлімшесі вокзал шаруашылығы бөлімінің бастығы Айбек Қуанышевтің айтуынша, перрон жұмысы бүгінде аяқталды. Жалпы, бұл жобаның құны 319 млн 382 мың теңге болып бекітілген. Перрон ұзындығы 448,8 метр, ені 4 метр. Перрон аумағында әкімшілік ғимараты салынып, оның ішіне инженерлік инфрақұрылым жүйелері, кәріз, су, газ, тоқ тарту жұмыстары жүргізілген. Жоғары стандарттарға сай ғимаратта желілік полиция бөлімі, қойма және кішігірім асхана орналасқан. Сонымен қатар жобада «led» шамдары бар 37 дана көше жарығы және жолаушылар ыңғайлығы үшін 10 дана отырғыш, 10 дана қоқыс жәшігі, т.б. қарастырылған. Вокзал аумағын тоқпен қамту үшін 1 дана КТПНГ 25Ква 6/0.4 Кв қондырылды. Сонымен қатар вокзал аумағына толықтай өрнекті кеспе тас төселді.  

«Кластан тыс» станция дәрежесі бар Мақат станциясы арқылы республикалық және халықаралық дәрежедегі 14 жұп пойыз өтеді. Соның ішінде «Куляб-Мәскеу», «Ташкент-Волгоград», «Душанбе-Мәскеу», «Ташкент-Үргеніш-Саратов», «Худжанд-Мәскеу» транзиттік пойыздары, «Атырау-Құлсары» жұмысшы пойызы, «Жолаушылар тасымалы» АҚ-на қарасты Тальго вагондарынан құралған «Атырау-Алматы», «Атырау-Астана-Нұрлы жол», «Атырау-Алматы-1», «Атырау-Астрахань», «Атырау-Маңғыстау», «Атырау-Ақтөбе» пойыздары бар.