Еңбек адамы: Құрылғыларды қалпына келтіруші Надежда Бакланова
Түркістан облысы бойынша меншікті тілші
Арыс белгі беру және байланыс дистанциясында 30 жылдан бері еңбек етіп келе жатқан Надежда Бакланова бүгінде КИП бақылау-сынау пунктіндегі релелік СОБ құрылғыларының электромеханик-қабылдаушысы.
Мектеп бітіре сала Арыс қаласындағы теміржол колледжінде «электромеханик» мамандығы бойынша білім алып, осы мекемеге келген ол содан бері тынымсыз тер төгіп келеді.
ШЧ-38 Арыс белгі беру және байланыс дистанциясының бастығы Нұрлан Жүнісовтің айтуынша, қазіргі кезде аймақтағы пойыз қозғалысы микропроцессорлы диспетчерлік орталық жүйесінің (МП АСДЦ) озық технологияларының көмегімен реттеледі. Орталықтандырылған цифрлық жүйенің тиімділігі сол, егер учаскеде қандай да бір белгі байқалмай немесе бағыттағыш бұрма қажет тұсқа аумай қалған жағдайда, ол туралы ақпарат диспетчерлік орталықтағы экраннан сол мезетте-ақ көрінеді екен. Жауапты мамандар шұғыл ақау анықталған тұсқа жетіп, істен шыққан құрылғыны қалпына келтіру үшін Надежда Юрьевна секілді бесаспап маманның темір үстеліне қояды...
– Дәл қазір мен белгі беру құрылғыларының жай-күйін тексерумен айналысып отырмын. Яғни бізге дейін жөндеуден шыққан құрылғының бүтіндігі мен жалғанған тұстарын, дұрыс жинақталуын, бекітпелерін, электрлі және механикалық сипаттамаларын арнайы құралдармен тексеремін, – дейді тексеру стенді деп аталатын үстел үстінде жатқан құрылғыны зерделеп отырған Надежда Юрьевна.
Әріптестері соңғы тексерістен өткізу үшін алдына әкелген құрылғыны тексеру ТША типті арнайы құралдың көмегімен жүзеге асырылады. Бұл деректерді кодтау құрылғысы болып табылады. Тексеру процесі ойдағыдай орындалып біткен соң, құрылғының дұрыс жөнделгенін және оны тексерген жауапты қызметкердің аты-жөні жазылған бирка ілінеді. Оған жөнделу мерзіміне қатысты деректер де жазылып, толтырылады.
Бүгінде 300-ге жуық қызметкердің басын қосып отырған Арыс белгі беру және байланыс дистанциясында Надежда Юрьевна секілді тәжірибелі мамандар аз емес. Олар Орынбор-Ташкент темір жолының 3102 мен 3344 км аралығында орналасқан 1037 бағдаршамдық белгі беру құрылғысының мінсіз жұмысын қамтамасыз етіп келеді. Одан бөлек, өздеріне тиесілі учаске бойында 583 бағыттағыш бұрманың қалыпты жағдайда жұмыс істеуін мұқият қадағалайды.
Бұл – Надежда Бакланова сынды өз ісінің кәсіби мамандарының көзге көрінбейтін, бірақ өте күрделі де жауапты жұмысының нәтижесі екені анық.