Білікті маман құрметті демалысына шықты
"Қазақстан теміржолшысы" газетінің Жамбыл облысындағы меншікті тілшісі
Еліміздің логистикалық қуаты жүк және жолаушылар тасымалы қызметін қамтамасыз ететін теміржолдың әлеуетіне қарап бағаланады десек, саланың даму деңгейі білікті мамандарға байланысты екені талас тудырмайды.
«ҚТЖ» ҰК» АҚ – «Жамбыл магистральдық желі бөлімшесі» филиалы директорының вокзал шаруашылығы бойынша орынбасары Бейбіт Садықбеков – бұл салада он жылдан аса уақыт қана еңбек етсе де басқару-ұйымдастыру ісінде тәжірибелі де білікті маман ретінде танылған жан. Сондықтан жуырда зейнет жасына толып, құрметті еңбек демалысына шыққан жанды әріптестері үлкен құрметпен қимастықпен шығарып салды.
Саладағы жұмысын 2014 жылы Ірілендірілген Жамбыл жол дистанциясында инженер болып бастаған ол кейін Жамбыл магистральдық желі бөлімшесінде өндірістік бөлімнің жетекші инженері, салық есептеу бөлімінің, қаржыландыру бөлімінің жетекші бухгалтері қызметтерін атқарады. Ал оған дейін Жамбыл технологиялық институтының түлегі Жамбыл автокөлік басқармасында инженер, Жамбыл облысының әкімшілік аймақтық қорының басқарушы-менеджері, ал 2004 жылы Тараз қалалық статистика бөлімінің бастығы, «Казтранссервис Оңтүстік» АҚ Жамбыл филиалында жетекші инженер, бөлім бастығының орынбасары, бөлім бастығы қызметтерін атқарған.
Бейбіт Айтбайұлы «Қазақстан темір жолы» ұлттық компаниясының «Адал еңбегі үшін» және Жамбыл облысы әкімінің «Облысқа сіңірген еңбегі үшін» төсбелгілерімен марапатталған.