Көне дәстүрді жаңғыртты
Атырау облысы бойынша меншікті тілші
Атырау теміржолшылары Ұлыстың ұлы күні – наурыз мерекесі қар- саңында «Менің елімнің дәстүрлері» челленджін ұйымдастырып, оған магистральдық желі бөлімшесіне қарасты мекемелер түгел қатысты.
Челлендж шартына сай әр бөлім қазақтың бір салт-дәстүрін таңдап, қойылым немесе шағын көрініс дайындауы тиіс. Атырау магистральдық желі бөлімшесі ұмытылып бара жатқан «Босаға майлау» дәстүрін таңдап алыпты. Босаға майлау – жастар жеке отбасы құрғанда немесе жаңа үйге кіргенде жақын-жуықтары келіп, үйдің босағасына май жағады. Бұл осы үй берекелі, майдай жұғымды, көптің үйі болсын деген ұғымды білдіреді. Көктемде бірінші шайқаған майды отбасындағылар ауыз тимей тұрып, есік жақтауын, табалдырықты, киіз үйдің ас-су сақталатын жағын майлау ырымы да бар. Босаға майлаған адамға кәде беріледі.
Бөлімшенің персоналды басқару бөлімінің бастығы Анар Жалғасбаеваның айтуынша, ұлттық салт-дәстүрімізді насихаттауға теміржол мекемелері белсене кірісіп, бірінен бірі асып түсуге тырысқан. Бейнеролик қала сыртындағы Еркінқала елдімекеніндегі «Этно-ауыл» ұлттық орталығында дайындалып, киіз үйде «Босаға майлау» дәстүрі, ұлттық жөн-жоралғы, ырымдар жасалған.