Ұлттық спорт ойындарына жүзден астам теміржолшы қатысты
Ақтөбе облысы бойынша меншікті тілші
Ақтөбеде Наурыз мейрамы шеңберіндегі Ұлттық спорт күнінде жүзден аса теміржолшы ұлттық ойындарға қатысты. Төл спортымыздың арқан тарту, қол күресі, асық ату, кір тасын көтеру түрінен өткен жарыс командалық тәртіппен жүрді.
«Жолаушылар тасымалы» АҚ-ның «Батыс» және «Оңтүстік» аймақтық филиалдары, Вагонсервис мен бөлімше командалары қатысқан спорттық сайыс наурыз тілек, ардагерлердің ақ батасымен басталды.
Жарыс асық ату ойынынан басталып, мерген жігіттер өнері көпшілікті тәнті етті. Ал білекті жігіттер қол күресінің сәнін келтірді. Нағыз балуан жігіттер арасында күш пен білектің мықтылығы сынға түсті. Қазақтың қанына сіңген бәсекелі бәйге – арқан тарту ойыны да қызықты өтті. Ұжым үшін, команда үшін жанын салған жігіттерді жігерлендірген қыз-келіншектер қиқуы да жарыстың сәнін келтірді.
«Қазақтың ұлттық спорт ойындары бойынша жарыс өте тартысты өтті. Биыл ұлттық мерекеміз Рамазан айымен тұспа-тұс келді. Жолсеріктеріміздің көбі ораза болса да белсенділік танытып жатыр», – деді Батыс аймақтық филиалы кәсіподақ ұйымының төрағасы Құттыбай Кеулімжайұлы.
Қазақы нақышта киінген қыздар келушілерге көже, бауырсақ, шұбат ұсынды.
Спорттық ойындарда үздік ойын көрсеткен Вагонсервис командасы жүлделі бірінші орынға лайық деп танылды. Екінші орын байқау ұйымдастырушыларына бұйырды. Бөлімше мен «Оңтүстік» аймақтық филиалдар үшінші және төртінші орынды бөлісті.
«Биыл өңірімізге көктем ерте келді. Жаймашуақты ауа райында Наурыз мерекесі ерекше аталып өтіп жатыр. Ұлттық спортты дәріптеуге арналған шараға бірауыздан қатысып жатқан ұжымдарға алғыс айтамын», – деді «Жолаушылар тасымалы» АҚ «Батыс» аймақтық филиалының басшысы Ердәулет Сейтқазинов.