Абаттандыру айлығы басталды

Ел шығысындағы теміржолшылар «Таза Қазақстан» бағдарламасы аясында екі айлық тазалық маусымын бастады. Жалпыөңірлік сенбілік бір реттік акция емес, жыл бойы жалғасатын болады.  

Осыған орай байтақ желі бойындағы барлық теміржолшылар қауымы жаппай тазалық шараларын қолға алды. Әсіресе теміржол вокзалдары мен елді мекен ішіндегі желінің қос қапталы баса назарға алынуда. Бұл жұмыстардың бәрі жылда жүргізілгенімен биылғы жылы Аягөз, Семей және Өскемен вокзалдарының жөндеуден өтуімен қоса атқарылып, бөлімшеге қарасты нысандар аумағы толықтай абаттандырылатын болады.

– Биылғы жазда Ұлы Абайдың 180 жылдық мерейтойына орай үлкен шара өтеді. Президентіміз айтқандай, бұл мерейтойды лайықты деңгейде атап өтуіміз керек. Ал қаланың тазалығы вокзалдан басталатыны анық. Бұл ретте бізге жүктелген жауапкершілік те ауқымды. Семейге келетін қонақтарға меймандарға көркем де таза қаламызды ұялмай көрсете алуымыз керек. Осы орайда өткен сенбі желі бойында сенбілік шаралары басталып кетті. Маусым айына дейін жоспарлы жұмыстарды толық жүзеге асыруға тиіспіз, – дейді бұл орайда НЖС-6 бөлімшесі кадр бөлімінің бастығы Данияр Баймағұлов.

Биылғы жылы абаттандыру мен көгалдандыруға ерекше көңіл бөлінбек. Аймақ бойынша барлығы 77 мың түп ағаш отырғызу міндеттеліп отыр. Оның сыртында жарықтандыру жұмыстары да қолға алынатын болады. Желі бойындағы тазалық шаралары арнайы комиссияның қарауынан өтетін болады. Бөлімшеге қарасты бірқатар деполар мен станциялар аймақ көлемінде өткізілетін тазалық байқауына қатысуға ниет білдіріп отыр.  

– Бөлімше бойынша басталған тазалық айлығына біз де бір кісідей үн қосудамыз. Вокзал маңайын тазартып, абаттандыру жұмыстарынан соң ағаш егуді бастаймыз. Мәслихат депутаты ретінде де бұл мәселе басты назарымда тұр, – дейді Жаңғызтөбе станциясының бастығы Азамат Нұрғалиев.