Теміржолшылар «Таза Қазақстан» акциясына қатысуда
Ақтөбе облысы бойынша меншікті тілші
Шалқар станциясының теміржолшылары «Таза Қазақстан» республикалық экологиялық акциясына қатысуда. Өрт сөндіру пойызының жеке құрамы өткен сенбіде станция аумағына санитарлық тазалық жұмыстарын жүргізді.
Ақтөбе мемлекеттік емес өртке қарсы қызметінің бастығы Әділ Құбаевтың айтуынша, жалпыхалықтық экологиялық челенджіне ұжым бір ауыздан қолдау көрсетіп, өрт оқиғаларының алдын алу мақсатында өткен жылдан қалған қураған шөптерді жинастырып жағып, айналаны тазартты. Сонымен қатар Ақтөбе магистральдық желі бөлімшесі тарапынан Шалқар өрт сөндіру пойызына практикалық сабақтар ұйымдастырылып, Ақтөбе НПОЖ инспекторы және өрт сөндіру пойызы бастығы кезекшілік өткізді.
Санитарлық тазалық жұмыстары Ақтөбе-1, 2, Қандыағаш станцияларында да өтіп, ағаш-талдардың қураған бұталары кесілді, түптері әктелді. Арықтар қоқыстардан тазартылып, магистральдық желі бойынан тұрғындар төгіп кететін тұрмыстық қалдықтар шығарылды.