Шымкент вокзалы маңындағы алып сағат қайта іске қосылды
Түркістан облысы бойынша меншікті тілші
Шымкент қаласының орталығындағы маңызды нысандардың бірі — теміржол вокзалы маңындағы айналма жолдың қақ ортасында орналасқан символдық сағат қайта жаңғыртылып, іске қосылды. Қала әкімінің тапсырмасына сәйкес жүзеге асқан бұл бастама еліміздегі үшінші мегаполистегі көрнекті нысандардың бірі ретінде қайта жанданды.
Вокзал – қаланың кіреберіс бас қақпасы болғандықтан, оның көркі мен безендірілуі, жолаушыларға жайлы қызмет көрсетуі ұтымды ұйымдастыру мызғымас алғышарттардың бірі. Сондықтан да Шымкент қаласындағы жергілікті атқарушы билік өкілдері Шымкент вокзалы мен оның айналасының аббаттандырылуына жіті көңіл бөліп келеді.
Жалпы, теміржол вокзалы ғимараты өткен жылы ғана күрделі жөндеуден өтіп, заманауи үлгіде қайта жаңғыртылып пайдалануға берілген болатын. Тәулігіне 27-28 пойыз қабылдап-жөнелтуге қауқарлы вокзалдың сан түрлі сервистік қызметін бүгінгі таңда орта есеппен 6 мың жолаушы пайдаланады. Мұнда Шымкент магистральдық желі бөлімшесі филиалының вокзал шаруашылығы бөліміне қарайтын 21 маман аталған нысанда еңбек етіп, тәулік бойы тынымсыз тер төгіп келеді. Енді міне, көп уақыт өтпей вокзалдан қалаға шыққан беттегі айналма жолдың ортасындағы мұнаралы сағатты жөндеуден өткізіп, қайта іске қосты. Ендігі жерде бағана басындағы төрт жаққа бағытталған сағаттар уақыт дәлдігін менмұндалап көрсетіп тұрады. Әкімдік өкілдерінің айтуынша, қала келбетінің бір бөлшегіне айналған бұл нысанға швейцариялық «Hublot» маркасының қосалқы бөлшектері пайдаланылған.
Негізінен, бұл Шымкент қаласы бойынша қоғамдық орталықта орналасқан жалғыз ғана алып сағат. Сол себепті де оның қайта іске қосылуы – тұрғындар мен қала қонақтары үшін жағымды жаңалық болды.