Аралда теміржол өткеліне көпір салынды
Қызылорда облысы бойынша меншікті тілші
Арал ауданы орталығындағы Қызылорда ЖТ бөлімшесіне қарасты Арал теңізі станциясының маңында теміржол өткелінің орнына жаңа автокөлік көпірі салынып пайдалануға берілді. Осылайша теміржолдың екі бетіне орналасқан тұрғындар теміржол өткелінен өту үшін пайда болатын кептелістен арылып, аралдықтардың арманы орындалды.
Арал ауданының тұрғындары үшін көптен күткен қуанышты күн келіп жетті. Аудан орталығындағы теміржол өткелінен өтетін пойыздар кезінде көліктердің ұзын-сонар кептелісте тұратыны жергілікті жұртқа жақсы таныс. Бұл мәселе ақыры шешімін тапты – теміржол үстінен автокөлік пен жаяу жүргіншілерге арналған заманауи аспалы көпір салынып, пайдалануға берілді.
Құны 3 млрд 140 млн теңге болатын, ұзындығы 940 метрге жететін жаңа көпір «Aманат» партиясының сайлауалды бағдарламасы аясында жүзеге асқан ірі жобалардың бірі. Көпірдің ашылу салтанатына Қызылорда облысының әкімі Нұрлыбек Нәлібаев пен ҚР Парламенті Мәжілісіндегі «Aманат» партиясы фракциясының мүшелері Мұрат Әбенов, Мархабат Жайымбетов, Мұрат Ергешбаев, Арал ауданының әкімі Аманжол Оңғарбаев және жергілікті тұрғындар, теміржолшылар қатысты.
«Бұл – аралдық ағайынның көптен күткен арманы еді. Көпір көлік қозғалысын жеңілдетіп қана қоймай, аудан халқының тұрмысын жақсартады. Жаңа өткел Аралдың болашағына жол ашып, өңірдің дамуына тың серпін береді»,-деді облыс әкімі Нұрлыбек Нәлібаев құттықтау сөзінде.
Салтанатты шарада ҚР Мәжілісінің депутаты Мархабат Жайымбетов жиналған жұртшылықты қуанышты сәтпен құттықтап, мемлекет және қоғам қайраткері Құдайберген Саржанов игі тілекпен батасын берді.
Көпірге түнгі жарықшамдар мен жаяу жүргіншілер жолы орнатылып, заманауи талаптарға сай жабдықталған. Ел игілігіне берілген нысан тек көлік қатынасын жеңілдетіп қоймай, ауданның әлеуметтік-экономикалық дамуына да оң ықпал етпек.
Шара аясында өңірдің өркендеуі үшін еңбек еткен азаматтар «Қызылорда облысының дамуына қосқан үлесі үшін» медалімен марапатталып, мердігер мекеме қызметкерлеріне облыс әкімінің алғыс хаты табысталды.
Жаңа аспалы көпір – Аралдың дамуы жолындағы маңызды қадам. Бұл нысан алдағы уақытта өңірдің экономикалық белсенділігін арттырып, тұрғындардың әл-ауқатын жақсартуға сеп болады деген сенім зор.