Тараз оқу орталығындағы жаңашылдықтар

Қазір «Қазақстан темір жолы» ҰК» АҚ Тараз көліктегі оқу орталығында біліктіліктерін арттырып, кезекті оқу курсынан өткен теміржолшылар қайтадан жұмысқа оралып, тыңдаушылардың жаңа легі келіп жатқан кез. Осылай жыл бойы оқу процесі толастамайды.

– Орталыққа теміржолшылар еңбек алаңында енгізіліп жатқан жаңа технологиялардың тілін үйреніп, жұмыс барысында туындайтын сұрақтарына жауап алу үшін келеді. Сол себепті оқытушылар теориялық-практикалық тұрғыда тәжірибелі мамандар ма, соған назар аударады. Бізде жалпы 18 қызметкер, 13 мұғалім, жалпы 31 адам еңбек етеді. Олардың бәрі – осы саланың қыр-сырын жақсы білетін білікті кадрлар. Жалпы орталықтағы әрбір оқу кабинеті стандарттарға сәйкес барлық заманауи талаптарға жауап беретін арнайы оқу құрылғыларымен жабдықталған, – дейді Тараз көліктегі оқу орталығының директоры Лашынкүл Күзербаева. Оқу орталығында тиісті материалдық базамен жабдықталған 13 оқу кабинеті, тест тапсыратын бір компьютерлік сынып бар.

Компьютерлер қажетті ақпараттық жүйелерге қосылған. Әр компьютерге 3Д жүйесінде жаттығу бағдарламасы да жүктелген. Осы жаттығу жүйесі арқылы машинистер сынақ тапсырып, тәжірибелерін шыңдай алады. Оқу кабинеттері негізгі ғимаратта, ал электровоздың қондырғысы, пайдалануы және техникалық қызмет көрсетуі, іштен жану қозғалтқышы, орталықтандырылған дабыл және блоктау электромеханика сынды кластар қолданылатын техникаларына қарай өз алдына бөлек орналасқан. Сондай-ақ практикалық полигон мекеменің ауласында. Онда жолшылар мен жол шеберлері шпалдардың, бағыттауыш бұрмалардың, рельс бекітпелерінің орналасуын көріп, тәжірибелік сабақ өтеді.  

– Біздің орталыққа біліктіліктерін арттыруға Қазақстанның барлық облыстарынан келеді. Оңтүстік, солтүстік, шығыс, батыс аймақтарды түгел қамтимыз. Жылына 3000-ға жуық теміржолшы оқып шығады. Оқу процесінің мерзімі әртүрлі. Мысалы, біліктілігін арттыруға келсе, 1 ай оқиды. Ал дайындық курстары 3 ай, – дейді орталық басшысы.  

Курсқа келетін теміржолшыларды мамандығы бойынша сараласақ, 33 түрлі кәсіп иелері бар. Айталық, дефектоскоп арбасының операторынан бастап, жол бригадирі, жол шебері, дрезина жүргізушілері, СОБ электромеханиктері мен электромонтерлары, локомотивтердің түрлеріне қарай тепловоз, электровоз машинистері мен көмекшілері, жол машиналарын реттеуші немесе бағыттаушы жөндеуші, жылжымалы құрамды жөндеуші секілді әр салалық бағыттағы жұмысшы мамандықтардың бәрі орталыққа келіп, білім-білігін жетілдіре алады.