Қала келбеті – теміржол бойынан басталады

Семей магистральдық желі бөлімшесінің басшысы Айдын Шәукежанов облыс әкімі Берік Уәлимен бірге облыс орталығын көктей өтетін теміржол бойының тазалығын қадағалап шықты. Әсіресе Жаңа-Семей мен Семей станциясына кіреберіс жол жиектеріне ерекше назар аударылды.

Мақсат – желі бойының тазалығы мен эстетикалық келбетін жақсарту. Осы орайдағы атқарылуы тиіс іс-шараларды пысықтау болатын. Тексеріс барысында облыс орталығының ішінде және шеткері аумақтарында бірқатар жерлерде қоқыс үйінділері бар екені анықталды. Шаһарға кіріп келе жатқан жолаушылар пойызының терезесінен қарағанда жайсыздық тудыратын бұл көрініс қала тазалығы үшін үлкен сын. Желінің қос қапталын теміржолшылар өз күштерімен тазалап, апта сайын сенбілік жұмыстарын өткізгенімен, станция басынан тыс аумақтардағы жағдай аса жақсара қоймаған сыңайлы. Көбінесе жеке сектордағы ахуал алаңдатарлық. Бұл ретте тіпті теміржол бойына қоқыс төккен тұрғындарға 20 АЕК, заңды тұлғаларға 30 АЕК-тен бастап 100 АЕК-ке дейін айыппұл салу нәтиже берер емес.  

Осы орайда облыс әкімі қала әкімдігінің өкілдеріне теміржол бойындағы аумақтарды бақылауда ұстап, жол жиегінде шашылып жатқан қоқыстарды дереу шығаруды тапсырды. Тазалық талаптарын орындамағандарға заң аясында қатаң түрде тиісті шара қолданылатынын ескертті.

– Теміржол жиектерінде шашылып жатқан қоқыс өте көп. Қаламызға келетін қонақтар осының бәрін көріп жүр. Мұны тез арада ретке келтіру қажет. Қалаға кіреберіс теміржол жиектері мен тас жолдардың маңындағы барлық қоқыстарды жинап, шіріген ағаштарды тазарту керек, – деді бұл орайда облыс әкімі.  

Осы сапар қорытындысы бойынша көп ұзамай атқарылуы тиіс бірқатар іс-шаралар жоспары қабылданды. Атап айтсақ, теміржол бойының жекелеген аумақтарына «Қоқыс тастауға болмайды» деген белгішелер қойылатын болды. Сонымен қатар ендігі аралықта жаяу жүргіншілер өтетін жол өтпелеріне арнайы бейнекамералар орнатылмақ. Бұл орайда желілік полиция қызметі күшейтілмек. Сөз орайында НЖС-6 басшысы Айдын Мақсұтбекұлы теміржолшылар қауымы жүргізіп жатқан сенбілік жұмыстарына тоқталып өтіп, желі бойындағы тазалық мәселесі бойынша қалыптасқан ахуал жайлы түсінік беріп өтті.  

Айта кетсек, Семей ЖТ бөлімшесі бойынша 5 сәуірден бастап «Таза Қазақстан» бағдарламасы аясында облыс әкімінің бастамасымен жалпыөңірлік тазалық акциясы басталған болатын. Апта сайын өткізілетін сенбіліктерге желі бойындағы барлық станциялардағы теміржолшылар қауымы атсалысып, 20 мың тоннаға жуық қатты тұрмыстық қалдықтар қоқыс полигонына шығарылды. Бұл жұмыстар алдағы уақыттарда да жалғаса бермек. Себебі тамыз айында облысымызда республикалық деңгейдегі бірқатар қоғамдық іс-шаралар өткізіледі. Атап айтсақ, Абай хакімнің 180 жылдық мерейтойы кең көлемде тойланбақ. Яғни ел түкпірі мен шет елдерден ағылатын қонақтар саны да көп болары анық. Демек, желі бойындағы тазалық та тәртіп пен талапқа толық сай болуы тиіс.