Ардагерлерге сый-құрмет көрсетілді
"Қазақстан теміржолшысы" газетінің Жамбыл облысындағы меншікті тілшісі
Жамбыл жүк тасымалы бөлімшесі директоры Айдын Сеитбенбетов, ардагерлер кеңесінің төрағасы Бауыржан Найманбаев, бөлімше кәсіподақ ұйымының төрағасы Серік Наурызбаев, кадр бөлімінің меңгерушісі Меруерт Баймұрзаева ардагер теміржолшы Әбдуалы Данаевтың шаңырағына арнайы барып, қарияға сый-құрмет көрсетті.
Филиал директоры Айдын Пайзылдаұлы жаңа буын әр кезеңде теміржол саласын дамытуға үлес қосқан аға буынның еңбегіне құрметпен қарайтынын айта келе, ардагердің кеудесіне «Қазақстан теміржолына-120 жыл» мерейтойлық медалін тағып, естелік сыйлық табыс етті. Бауыржан Найманбаев қарияның иығына шапан жауып, кәсіподақ атынан азық-түлік себетін тапсырды.
– Ұлы Отан соғысы жылдарында бұғанасы қатпаған балалардың өзі аналарымен тылда еңбек етті. Әбдуалы Данаев та еңбекпен есейген. Кейін ұзақ жыл теміржол саласында жұмыс істеп, Тараз теміржол көлік және коммуникация колледжінде оқытушы болып, жас мамандарды даярлаған. Ұрпақтар сабақтастығын сақтау әрі ардагер теміржолшылардың еңбегін жас буынға үлгі ету мақсатында Жеңістің 80 жылдығына және «Жұмысшы мамандықтар жылына» орай Жамбыл бөлімшесі қарияға құрмет көрсетуде, – дейді Меруерт Бейсенбекқызы.
93 жастағы ақсақал халық жазушысы Шерхан Мұртаза, мемлекет және қоғам қайраткері Қаратай Тұрысовпен бір класта оқыған. Мектепті бітірген соң қазіргі Санкт-Петербург қаласында білім алыпты. Елге келген соң Талас станциясында еңбек жолын бастап, уақыт өте келе Жаңатаста станция бастығы болып жұмыс істеген. Әбдуалы Данаев Тараз теміржол көлігі және коммуникация колледжінде еңбек етіп жүрген жылдары, кейін зейнетке шыққаннан кейін де салалық терминдерді қазақшалап, бірнеше авторлық әдістемелік оқулықтар жазыпты. Соның бірі «Теміржолдар мен стансалар құрылымы» деп аталады. Ардагер теміржолшының кітаптары бүгінде оқу процесінде қолданылуда.