Атырауда жолдар жаңарып жатыр
Атырау облысы бойынша меншікті тілші
Жасыратыны жоқ, Атырау өңірінде әлі де болса жаңартатын жолдар бар. Биыл Атырау магистральды желі бөлімшесі, Атырау жол дистанциясына берілген темір жолды күрделі жөндеу жоспары 40,5 шақырым.
Дистанция бастығы Нұрбай Темірзақтың айтуынша, Ганшкино-Атырау учаскесінің 3,4,5 разъездері аралығында оның бүгінгі күнге дейін 24,8 шақырымы орындалды.
«Аталған участоктерде бұрынғы ағаш шпалдар түгелдей алынды. Әуелі жаңа мен ескінің түйіскен тұсы тазаланып, бұрандалары ағытылды. Сол сәтте кранмен ескі рельс шпалымен қоса көтеріліп алынды да, бос вагонға жиналды. Содан кейін тракторлар рельсі алынған жолды жыртып, тегістеп, салмақпен нығыздап, жол жаңа темірбетонды шпалдар төсеуге әзірленді. Жердің негіздемесі төселіп, шебін төсеу, жерді нығыздау, басқа да жұмыстар технологиялық талаптарға сай жасалды. Күрделі жөндеу жұмыстары барысында 6 сағаттан толаскез алынып отырды», - дейді ол.
Жұмыс барысында ауыр жүктерді көтеріп-түсіруге (темір бетонды бұрмаларды, бағаналарды, шпалдарды, ауыр техникалардың қосалқы бөлшектерін) түсіруге КЖ-562 маркалы кран пайдаланылып, ДУАМАТ, Унимат, ДГС, ПБР, ВПРС т.б. машиналар да қолданылған. Содан соң 25 метрлік дайын жаңа рельстер жолға қойылып, олар талапқа сай орнатылған.
Сондай-ақ, биыл дистанция бойынша жоспарланған күшейтілген орташа жол жөндеу жұмыстары 6,363 шақырым болса, бүгінде оның 2,175 шақырымы орындалған. Ол жұмыстар ст. Ганюшкино-9-10 разъездер аралығында жүргізілген. Р-50 рельстерін Р-65-ке алмастыру жұмысы да дистанция жоспарындағы кезек күттірмес істердің бірі десе болады. Биыл барлығы 14,690 км рельс алмастыру қажет болса, қазіргі уақытта Аққыстау, 15-разъезд, ст. Атырау, ст. Сағызда 1,223 км жасалған. Өңірде темірбетонды шпалдарға жаңа бағыттамалы бұрмалар да орнатылып, 4 жиынтық бұрма жаңасына ауыстырылған. Ганюшкино-Исатай учаскесі аралығында жаңа рельстерге сай бұрынғы пайдаға асатын бұрмаларды ауыстыру 6 жиынтық болды, жоспардағысы 20 жиынтық.
«Барлық жол жөндеу жұмыстары рет-ретімен жасалып жатыр, ол әрине алдымен қозғалыс қауіпсіздігін сақтайды, содан кейін пойыздардың өткізу қабелітен арттырады, яғни жылдамдыққа да әсері бар», - дейді депо басшысы.