Қызылсай станциясының мүмкіндігі кеңеймек

Шымкент іргесіндегі Қызылсай станциясы арқылы күн сайын 70 вагон жүк тиеліп, 150-170 вагон жүк станция маңындағы тұйық жолдарда босатылады.

Жүк вагондарын қабылдап-жөнету мен вагон өңдеу қабілеті өте жоғары саналатын іргедегі Қазығұрт станциясына жылжымалы құрамдар осы Қызылсайдың бас жолымен, 4-ші және 6-шы жолдар арқылы кіреді. Бұл әрекет өз кезегінде Қызылсай станциясының өңдеу мүмкіндігін тежеп, өткізу қабілетін аша түседі. Ал сала мамандары үшін мұндай көрсеткіш көңіл көншітпейді. Себебі, станцияішілік жолдарға аздаған өзгеріс енгізетін болса, Қызылсайдың вагон өңдеу мүмкіндігі де ашылып, кең тыныспен жұмыс атқарар еді.  

Ол үшін Қызылсайдағы бас жолдың солтүстік мойындығына 2 бағыттағыш бұрма қою арқылы станция паркінің өткізу жүктемесін жеңілдетіп, өңдеу мүмкіндігін арттыру қажет. Себебі, жүк вагондарын өткізгенде станцияның вагон өңдеуі мәжбүрлі түрде саябырсып жатады. Негізінде, бұл өзі ертеректе қолданыста болған әдіс. Соңғы жылдары жылжымалы құрамдар қатынасы жанданып, жүк тасымалы ағыны ұлғайған шақта қайта жандандыру қажеттігі туындауда.

– Негізінен, біздің парктегі 4, 6, 8 жолдар ең сұранысқа ие, қызмет көрсету әлеуеті де артық жолдар санатында. Қазығұрт станциясында перегон болғандықтан, ол жаққа вагон жеткізуде біздің әлгі маңызды жолдарымыздың әлеуеті сонымен шектелуде. Енді, өзге де жолдарды тиімді пайдалану мақсатында біршама өзгерістерді сәтті енгізе алсақ, станцияның мүмкіндігі арта түседі, – дейді станция бастығы Баянды Раманқұлов.  

Ал 1, 2 жол басымдыққа ие болғанымен, олар осы күндері өткізу бағытында ғана пайдаланылуда. Сондықтан да станцияның вагон өңдеу бағытындағы өндірістік көрсеткіші көңіл көншітпейтін көрінеді. Қазіргі кезде бұл бағытта қызу жұмыстар жүргізілуде. Мәселе оң шешімін тапқанда Қызылсай станциясының өңдеу мүмкіндігі кеңейіп, өндірістік көрсеткіші жоғарылай түспек.