«Таза Қазақстан»: Семей теміржолшылары санитарлық тазалықты күшейтуде

Бүгінде Семей ЖТ бөлімшесі бойынша жалпыұлттық «Таза Қазақстан» бағдарламасы аясындағы жұмыстар кідіріссіз жүргізіліп жатыр. Ағымдағы жылдың сәуір айындағы №133 бұйрық бойынша қолға алынған іс-шаралар тікелей бөлімше басшылығының назарында тұр.

Бірінші кезектегі басты міндет – жалпы ұзындығы 728 шақырым бас жолды құрайтын желі бойына тазалық жүргізіп, талапқа сай ету.

Семейлік теміржолшылар бұл іргелі шараға кешенді түрде кіріскен болатын. Әуелгі кезекте барлық мекемелерде жиындар өтіп, жұмыс барысы жоспарланды. Сондай-ақ арнайы инструктаждар жүргізілді. Кадр бөлімі басшылығы әкімшілік-шаруашылық бөлімімен бірлесіп сенбілік өткізілетін аумақтарды белгілеп шықты. Осылайша жергілікті әкімдіктермен және коммуналдық қызмет өкілдерімен келісілген түрде қарқынды жұмыс басталған-ды.  

Осы орайда қазіргі күндері де желі бойында сенбіліктер жиі өткізілуде. Санитарлық тазалық іс-шаралары әсіресе Аягөз, Жарма, Жаңғызтөбе, Шар, Жаңа-семей сынды тораптық станцияларда жиі ұйымдастырылады. Атқарылып жатқан істер өткен көктемгі комиссиялық бақылау кезінде басты міндеттердің бірі ретінде есепке алынған еді. Яғни желі бойындағы мекемелер жұмысының негізгі көрсеткіші ретінде де бағаланған болатын.

Бұл ретте кластан тыс Семей станциясы өзге мекемелерге жан-жақты түрде үлгі болуда. Мәселен, осынау тораптық станция сенбілікке кең көлемде кірісіп, барлық станциялық жолдар мен ғимараттар маңы толықтай тазартылды.

Станция басы автокөлік жолдарынан біршама алыс жатуы себепті жиылған қоқыс арнайы платформаға тиелініп, кейіннен жүк машиналарына қайта тиелді. Желі бойында мұндай ауқымды шара бұрын-соңды болмаған еді. Сенбілік жұмыстарына 1 платформа, 4 жүк көлігі тартылды. Ал аумақты тазалауға станциядағы барлық теміржолшылар 100 пайыз қатысты.

Айта кетерлігі, семейлік қозғалысшылар тазалық акциясының ауқымын кеңейтіп, оны қайта жаңару мен жаңғыртудың басты алғышарты етіп алып отыр.

– Биылғы сенбіліктердің жөні бөлек. Келесі айда Семей елінде  ұлы Абайдың 180 жылдық дүбірлі тойы өткізілмек. Яғни ел түкпірі мен шет елдерден ағылатын қонақтар саны да көп болары анық. Демек тазалық шараларының да маңызы жоғары деген сөз. «Таза Қазақстан» акциясы аясында станция басы талапқа сай етілді. Абаттандыру, көгалдандыру да ойдағыдай жүзеге асырылуда. Мәселен, соңғы рет 2010 жылғы алапат өрттен кейін қайта жаңғыртылған станция ғимараты, сырт келбеті алғаш рет күрделі жөндеуден өтіп, мүлде жаңаша кейіпке енуде, – дейді бұл орайда пікір білдірген Семей станциясының бас инженері Бекзат Кәрімханов.

Мұндай жұмыстар жолаушылар нөпірі мол, мәслихат депутаты  Азамат Нұрғалиев басқаратын Жаңғызтөбе станциясында да жүргізілуде.

Жалпы, апта сайын өткізілетін сенбіліктерге желі бойындағы барлық станциялардағы теміржолшылар қауымы атсалысып, 20 мыңнан астам қатты тұрмыстық қалдықтар арнайы белгіленген қоқыс полигонына шығарылды.  

Алда да атқарылуы тиіс жұмыстар бар. Мәселен теміржол бойының жекелеген аумақтарына, жеке сектор маңына «Қоқыс тастауға болмайды» деген ескертпе белгішелер қойылып, жаяу жүргіншілер өтетін жол өтпелеріне арнайы бейнекамералар орнату да межеленіп отыр.  

Жергілікті теміржолшылар осынау тазалық акциясын жыл бойы жүргізуге ниетті. Жоғарыда аталған жұмыстар нәтижесінде тек желі бойында ғана емес, жалпы Абай елінде экологиялық мәдениет, эстетикалық талап пен талғам жоғарылап келе жатқанын айта кеу керек.