Құлсары дистанциясында жол жөндеу қарқын алды
Атырау облысы бойынша меншікті тілші
Биыл өңірде инфрақұрылым нысандарын жаңғырту, кеңейту, технологиялық процестерді жетілдіру мақсатында жол шаруашылығы бойынша аймақта 66,8 шақырым жол күрделі жөндеуден өтетін болып бекітілген.
Соның ішінде Құлсары жол дистанциясы бойынша 26,321 км – Майкөмген-Рзд-465-467-468 аралығы. Құлсары жол дистанциясы техника бөлімінің бастығы Әбілқасым Бурабековтің айтуынша, бүгінгі таңда Құлсарыда жұмыс қызған. 11 желілік айналымы мен ПДМ, ПЗ сынды цехтары және механикалық шеберханалары бар дистанция Мақат – Бейнеу бекеттері аралығындағы 296 км жолдың күтіміне жауапты. Дистанцияның қызмет көрсету аумағында төрт желілік станция мен жеті бөліктік пункт, 1 класты Құлсары станциясы, 14 теміржол өткелі, 11 теміржол көпірі, 18 теміржол өткелі, жүзге жуық темірбетон тұрбалар бар, олардың бәрінде де қауіпсіздік шаралары сақталған.
– Күрделі жөндеу жұмыстары бізде осы шілде айында жоспарланып отыр. Соған сәйкес аталған телімде бұрынғы ағаш шпалдар түгел алынады. Жердің негіздемесі төселіп, шебін төсеу, жерді нығыздау, басқа да технологиялық талаптарға сай жұмыстар жасалады. Құлсары станциясы мен 472-рзд аралығындағы 2,4707 шақырым күшейтілген орташа жөндеу жұмыстары да тамыз айына жоспарланған. Дистанция бойынша биыл 1,6 км ескі Р-50 рельстерін жаңа Р-65-ке ауыстыру көзделіп, қазіргі уақытта Құлсары станциясы, Рзд-Қоркөл-461-463-464 бекеттерінде оның жартысына жуығы орындалған. Сонымен қатар ағымдағы жылы Құлсары станциясында 10 жиынтық темірбетон бағыттамалы бұрмаларды ауыстыру жұмыстары да жүргізіліп жатыр. Сондай-ақ ескі бұрмаларды жаңа Р-65-ке ауыстыру бойынша 5 жиынтық ауыстырылған, – дейді техника бөлімінің бастығы.
Теміржолшылардың бас ауруына айналған мал мәселесі құлсарылықтар үшін де өзекті. Бүгінде дистанцияға қарасты Майкөмген станциясы, рзд-Сарға, рзд-461-467 арлығында 15,3 км көлемінде қоршау салынып жатыр.
